Ukraina u ndan mirënjohje grupit të hakerëve që kryejnë sulme kibernetike kundër Rusisë

Një ekip hakerësh që kryejnë sulme kibernetike kundër Rusisë kanë pranuar mirënjohje nga ushtria e Ukrainës.

Bëhet e ditur se ekipi One Fist ka vjedhur të dhëna nga kompani ushtarake ruse, ka hakuar kamerat në Krimenë e pushtuar dhe ka hakuar një prodhues të shquar rus të armëve.

Anëtarët e grupit vijnë nga tetë vende të ndryshme, duke përfshirë Britaninë e Madhe, SHBA-në dhe Poloninë, shkruan BBC, përcjell Telegrafi.

Kolektivisht, ata kanë nisur dhjetëra sulme kibernetike, ndërsa çertifikatat i kanë pranuar “për kontributin e rëndësishëm në zhvillimin dhe mirëmbajtjen e aktiviteteve jetike të ushtrisë”.

Ndryshe, që nga fillimi i konfliktit, Ukraina ka inkurajuar hakerët vullnetarë për të sulmuar objektivat ruse.

Kristopher Kortright i njohur si “Voltage” kishte filluar të kryente sulme kibernetike kundër Rusisë që kur ajo nisi pushtimin e Ukrainës në vitin 2022.

“Kam humbur punën time duke bërë këtë dhe kam shpenzuar të gjitha kursimet e jetës sime në ndjekje të një fitoreje për Ukrainën”, tha Kortright, duke theksuar marrëdhënien e fortë të grupit me ushtrinë ukrainase.

“Ata na dërgojnë ide dhe ne u dërgojmë atyre opsione”, shtoi Voltage.

Konflikti në Ukrainë ka shkaktuar një rritje të aktivitetit kibernetik. Grupe si Anonymous kanë shënjestruar shtetin rus me sulme përçarëse. Madje, në disa raste, hakerët kanë ndërhyrë edhe në radio dhe stacione televizive. /Telegrafi/