Pas pesë javë grevë në arsim, mësimi fillon të hënën

Reshit Kushaj nga Sindikata e Bashkuar e Arsimit, Shkencës dhe Teknologjisë sot në konferencën për media bëri të ditur se pas pezullimit të grevës në arsim deri në janar të vitit 2023, mësimi do të nisë të hënën, më 3 tetor.

Ai tha se viti shkollor do të jetë shumë i suksesshëm dhe se nuk do të ketë dështim për shkak të kësaj periudhe që është humbur mësimi.

“Mësimi fillon të hënën, viti shkollor nuk do të dështoj, besoj që ky vit do të jetë dhe më shumë i suksesshëm”, tha ai.

Tutje Kushaj u shpreh se do të kthehen në proces mësimor pa kushtëzime.

“Na kanë propozuar që të kthehemi në mësim edhe me kushtëzime, por ne kemi pranuar që të kthehemi në mësim pa kushtëzime”, tha ai.

I pyetur se a ka mundësi që ndonjë shkollë të mos nis mësimin të hënën, ai tha se të drejtë greve ka çdo individ, por bazuar në përvojën e mëparshme respektohet vendimi i SBASHK-ut.

Ndryshe, greva në arsim kishte nisur më 25 gusht kjo pasi Sindikata e Bashkuar e Arsimit dhe Shkencës së Kosovës (SBASHK) dhe Qeveria nuk arritën të bëjnë marrëveshje mes tyre.

Kërkesat e SBASHK-ut janë pagesa e 100 eurove për çdo muaj deri në miratimin e Ligjit për pagat.

Më poshtë mund t’i lexoni kërkesat e Bashkimit të Sindikatave të Pavarura të Kosovës:

100 euro nga buxheti i shtetit për të gjithë të punësuarit në sektorin publik përfshirë edhe punëtorët e Ndërmarrjeve Publike – deri në përmbushjen e kërkesave të mëposhtme

Përcaktimi i Pagës Minimale

Miratimi i Ligjit për Paga

Nisja e zbatimit të Ligjit për Sigurimet Shëndetësore

Nënshkrimi i marrëveshjes kolektive gjithëpërfshirëse

Amendamentimi-ndryshimi i Ligjit për Skemat Pensionale të Financuar nga Shteti, pranimi i përvojës se punës për të gjithë të larguarit nga puna gjatë viteve të 90-ta, dhe të eliminohet kriteri prej 15 vite përvojë punë para vitit 1999.  /Telegrafi/