Shakira rrezikon të paditet për mashtrim me tatime në Spanjë

Prokurorët spanjollë janë duke përgatitur një padi kundër Shakiras për mospagim të tatimeve për vlerën prej 14.4 milionë eurosh.

E përditshmja El Pais bën të ditur se përkundër që avokatët mbrojtës të këngëtares kanë mohuar diçka të tillë, pala e akuzës posedon fakte për të ngritur padi.

Një zëdhënës i Zyrës së Prokurorit në Spanjë ka thënë për AFP se deri më tani nuk është ndërmarrë asnjë veprim dhe se çështja është akoma në fazën e shqyrtimit.

Lexo po ashtu Lajmet për SHAKIRA

Shakira dyshohet se nuk ka paguar tatime në Spanjë në periudhën 2011-2014, edhe pse gjatë asaj kohe ka qenë rezidente në atë shtet.

Këngëtarja është në lidhje me futbollistin spanjoll, Gerard Pique, me të cilin ka dy djem dhe që nga viti 2011 ka qëndruar në Spanjë.

Mirëpo, zyrtarisht vendbanimin e ka zhvendosur në vitin 2015. Deri atëherë vendbanimi i saj zyrtar ka qenë në Bahamas.

Sipas avokatëve të saj, deri në vitin 2014, Shakira shumicën e parave i ka fituar nga turnetë ndërkombëtare dhe nuk ka qëndruar më shumë se gjashtë muaj në Spanjë – një parakusht për të qenë taksapagues në atë vend. /Telegrafi/