Vrasja në Bibaj, Prokuroria: Jemi duke punuar në mënyrë intensive për zbardhjen e rastit

Prokuroria Themelore e Ferizajt ka dhënë detaje mbi vrasjen që ka ndodhur të premten në fshatin Bibaj, ku një 89-vjeçar dyshohet se u vra nga një polic, i cili ishte jashtë detyrës zyrtare.

Prokuroria Themelore e Ferizajt në një përgjigje për Telegrafin, thonë se lidhur me vrasjen ka ndaluar dy persona të dyshuar, dhe se janë duke punuar për zbardhjen e kësaj çështje.

“Ju njoftojmë se mbrëmë nga Policia e Kosovës është njoftuar prokurori kujdestar i Departamentit të Krimeve të Rënda të Prokurorisë Themelore në Ferizaj, se rreth orës 19:30 në fshatin Bibaj, komuna Ferizaj, në parkingun e sallës së dasmave “Fron Palace”, ka ndodhur një rast i vrasjes dhe një person ka mbetur i vdekur pasi është qëlluar me armë zjarri. Me vendim të Prokurorit të Shtetit, është ndaluar i dyshuari F.R., (zyrtar policor) në kohëzgjatje prej 48-orësh për shkak të dyshimit të veprës penale “Vrasja e rëndë” sipas Kodit Penal të Republikës së Kosovës. Ndërsa, më vonë me vendim të prokurorit të shtetit është ndaluar edhe një person tjetër në kohëzgjatje prej 48 orësh për veprën penale në bashkëkryerje të vrasjes”, thuhet në përgjigjen e tyre.

Lexo po ashtu Vrasja në Ferizaj që dyshohet se e kreu një polic, gjithçka që dihet deri më tani

Gjithashtu, Prokuroria ka njoftuar se trupi i pajetë i viktimës S.S., (1935), me vendim të prokurorit të shtetit, është dërguar për obduksion në Institutin e Mjekësisë Ligjore në Prishtinë (IML).

“Prokuroria në koordinim me Policinë janë duke punuar në mënyrë intensive për zbardhjen e rrethanave të kësaj çështje penale. Po ashtu, ju njoftojmë se Prokuroria Themelore në Ferizaj, brenda afatit ligjor, ndaj dy të dyshuarve do të paraqesë kërkesë për caktimin e masës së paraburgimit ne Gjykatën kompetente për shkak të dyshimit të veprave penale të lartëcekura”.

Ndryshe, një ngjarje e rëndë ka ndodhur të premten në fshatin Bibaj të Ferizajt, një person u vra në parkingun e sallës e dasmave “Fron Palace”.

Viktima S.S i moshës 89-vjeçar dyshohet se u vra nga një zyrtar policor, vrasja dyshohet se është kryer me armë zyrtare, ndërsa i dyshuari ishte jashtë orarit të punës.

Pak orë pas vrasjes, në rrjetet sociale u shpërnda identiteti i personit të vrarë dhe dorasit, viktima ishte axha i Prindon Sadriut, bashkëshortit të presidentes së Kosovës, Vjosa Osmani.

Gjithashtu, sot disa media raportuan se presidentja Osmani dhe bashkëshorti i saj kanë qenë në dijeni lidhur me rastin, dhe se vrasja ka ndodhur për arsye morali. /Telegrafi/