Mbi 4,2 milionë vizita ishin nga Kosova, gjysma e turistëve që vizituan Shqipërinë vjet ishin “pushues patriotikë”

Më shumë se gjysma e turistëve që vizituan Shqipërinë vitin e shkuar ishin “pushues patriotikë”.

Të dhënat nga Ministria e Turizmit dhe Mjedisit tregojnë se nga rreth 10 milionë në total deri në fund të nëntorit, mbi 5.7 milionë turistë ishin nga Kosova, Mali i Zi dhe Maqedonia e Veriut.

“Kjo tregon se jemi shumë larg turizmit elitar, dhe të paktën për momentin jemi te sasia më shumës e cilësia. Kjo pavarësisht investimeve të shumta që janë kryer veçanërisht në jugun e vendit, por edhe Durrës”, thotë për A2 CNN Flora Xhamani Baba, eksperte e turizmit.

Me gjithë liberalizimin e vizave, pushuesit nga Kosova nuk e “tradhtuan” Shqipërinë. Të dhënat tregojnë se në harkun e muajve janar-nëntor vendin e vizituan gati 4.2 milionë shqiptarë të Kosovës, shifër kjo sa 38 për qind e totalit.

“Ata vijojnë ta preferojnë Shqipërinë. jo vetëm Durrësin e Shëngjinin që i kanë si shtëpinë e tyre, por edhe më në jug. Një pjesë e tyre ndërkohë nuk kanë ardhur për pushime, por thjesht e kanë pushime, por thjesht e kanë përdorur Shqipërinë si vend transit”, thotë Jetmira Hoxha, eksperte e turizmit.

Pas pushuesve nga Kosova, Italianët renditen të dytët për numrin më të lartë të pushuesve me mbi 1.1 milionë të tillë, ndjekur nga Maqedonia e Veriut, Mali i Zi dhe Greqia.

“Janë turistë që janë të përhershëm e që vijnë të 12 muajt e vitit. Veçanërisht ata italianë”, thotë Flora Xhamani Baba. “Një arsye është shtimi i fluturimeve veçanërisht me Italinë nga linjat “low cost”. Biletat më të lira rrjedhimit shtojnë turistët”, thotë Jetmira Hoxha.

Si pasojë e tensioneve që përshkallëzuan edhe në konflikte të armatosura, Izraeli dhe Rusia janë dy shtetet me rënien më të madh të pushuesve vitin e shkuar. Lista pasohet nga Kroacia, Norvegjia dhe Finlanda.

Të dhënat nga Ministria e Turizmit dhe Mjedisit tregojnë se vitin e shkuar vendin e vizituan 11,7 milionë pushues të huaj nga 10,1 milionë të tillë në 2023-shin. Rritja përllogaritet me 1,6 milionë apo 15,8 për qind.