Neuralink ka nisur rekrutimin e njerëzve për të filluar testimin e çipit

Kompania e teknologjisë së ndërfaqes nervore e Elon Musk, Neuralink po rekruton kandidatë për testet e para klinike njerëzore.

Neuralink tha në një njoftim të martën se studimi do të vlerësonte sigurinë e implanteve të tyre dhe robotëve kirurgjikalë, transmeton Telegrafi.

Kompania tha se qëllimi i tyre fillestar me testimin “është t’u japë njerëzve mundësinë për të kontrolluar kursorin ose tastierën e kompjuterit duke përdorur vetëm mendimet e tyre”.

Neuralink shtoi se testimi synohet të bëhet tek njerëzit që kanë kuadriplegji për shkak të një dëmtimi të palcës kurrizore të qafës ose sklerozës anësore amiotrofike (ALS). ALS është një sëmundje neuromuskulare që shkatërron në mënyrë progresive sistemin nervor dhe pengon kontrollin e muskujve.

Musk themeloi Neuralink në vitin 2016 me një ekip shkencëtarësh dhe inxhinierësh. Musk ka shpresa të mëdha për punën e kompanisë – ai tha në vitin 2019 se shpresonte se mund të ndihmonte njerëzimin të arrinte “simbiozën me inteligjencën artificiale”.

Në një ngjarje të kompanisë vitin e kaluar, Musk tha se do të testonte tek vetja çipat e trurit të Neuralink kur të fillonte testimi tek njerëzit.

“Ju mund të implantoni një pajisje Neuralink tani, dhe as nuk do ta merrnit vesh. Dua të them, hipotetikisht”, pati thënë Musk.

Mbetet e paqartë nëse Musk do të jetë pjesë e këtyre testimeve të hershme tek njerëzit.

Neuralink mori miratimin nga Administrata amerikane e Ushqimit dhe e Barnave (FDA) në muajin maj për të nisur testimin tek njerëzit. Deri më tani, kompania ka kryer vetëm teste në kafshë tek derrat dhe majmunët.

Në dhjetor të vitit 2022, Reuters raportoi se Neuralink është nën hetim federal për abuzimin e mirëqenies së kafshëve. Rreth 1,500 kafshë – duke përfshirë dele, derra dhe majmunë – janë vrarë që nga fillimi i testimit në vitin 2018, sipas Reuters. /Telegrafi/