Haliti: Qeveria është e izoluar, të rinjtë po ikin sepse s’ka punë e perspektivë

Deputeti i PDK-së, Xhavit Haliti, ka thënë se Qeveria e Kosovës, është e izoluar nga bashkësia ndërkombëtare.

Ai në emisionin “Five” të RTV Dukagjinit, tha se në Kosovë mungojnë investimet nga jashtë, dhe po ashtu sipas tij izolimi ka të bëjë edhe me mungesën e vizitës së njerëzve të rëndësishëm të bashkësisë ndërkombëtare në vendin tonë.

“Nuk jam ithtar i zjarrvënies pa nevojë. Përveç atyre që dërgohen që vijnë me sjellë mesazhe në lidhje me situatën që ka Kosova, Qeveria është e izoluar tërësisht, nuk ka vizita të kryeministrave, nuk ka investitorë, popullata po ikën, rinia po ikën sepse janë pa punë pa perspektivë, këto çështje duheshin të ishin të zgjidhura”, tha ai.

Haliti foli edhe për dialogun Kosovë – Serbi, teksa e akuzoi këtë të fundit që me qëllim po tenton të krijoj kriza, në mënyrë që të viktimizohet para ndërkombëtarëve.

“Problemi është i qartë, politika serbe është e interesuar të na fus në avanturë, që ta arsyetoj një veprim që tha Lajçak, mund të jetë përplasje. S’po them të jemi lojal dhe servil i Be-së, por duke e marrë parasysh të kaluarën dhe pozicionin dhe fuqinë që e kemi, ushtarake, ekonomike, territoriale dhe pozicionin që e ka qeveria të izoluar nga bota perëndimore, njëkohësisht edhe duke u përpjekur për t’u vlerësu dhe për t’u marrë vesh”, tha ai.