Zyra e Presidentes: Ende s’kemi pranuar vendimin e Kushtetueses për rastin e zgjedhjes së kryeprokurorit

Gjykata Kushtetuese e Kosovës i ka shpallur të papranueshme kërkesat e dy kundër kandidatëve të Blerim Isufajt, kryeprokuror i zgjedhur, me arsyetimin se ata nuk i kanë shteruar mjetet juridike siç përcaktohet me legjislacionin në fuqi.

Në njoftimin dërguar mediave më 4 korrik, kjo gjykatë sqaron se “kërkesat përkatëse i shpallë të papranueshme mbi baza procedurale, sepse parashtruesit e kërkesave nuk i kanë shteruar mjetet juridike siç është përcaktuar me paragrafin 7 të nenit 113 [Juridiksioni dhe Palët e Autorizuara] të Kushtetutës së Republikës së Kosovës”.

Por, Bekim Kupina, këshilltar për media i Presidentes, tha për Telegrafin se Presidenca nuk ka pranuar asnjë njoftim zyrtar.

Kupina tha se Zyra e Presidentes do të analizojë vendimin e Gjykatës Kushtetuese pasi ta pranojë atë, në bazë të vlerësimit të të gjithë procesit, do të vendosë lidhur me veprimet e radhës.

“Zyra e Presidentes së Republikës së Kosovës, deri më tani, nuk ka pranuar asnjë njoftim zyrtar, e as vendimin e plotë nga Gjykata Kushtetuese lidhur me rastet në fjalë. Pas pranimit të vendimit të plotë, Zyra e Presidentes do të analizojë vendimin e Gjykatës Kushtetuese dhe pastaj, në bazë të vlerësimit të të gjithë procesit, do të vendosë lidhur me veprimet e radhës,” tha Kupina./Telegrafi/