Rubio thotë se Hamasi ‘duhet çrrënjosur’

Sekretari amerikan i Shtetit, Marco Rubio ka mbështetur plotësisht qëllimet e luftës të Izraelit në Rripin e Gazës, duke thënë se Hamasi “duhet të çrrënjoset”.

Rubio u takua me kryeministrin izraelit Benjamin Netanyahu në Jerusalemin Perëndimor të dielën në fillim të një turneu rajonal.

Ai ka të ngjarë të përballet me reagime nga liderët arabë lidhur me propozimin e presidentit amerikan Donald Trump për të zhvendosur popullsinë palestineze nga Rripi i Gazës dhe rizhvillimin e tij nën pronësinë e Shteteve të Bashkuara, një plan që organizatat e të drejtave të njeriut e kanë quajtur spastrim etnik.

Netanyahu e mirëpriti planin, duke iu referuar gjithashtu si “të guximshëm” dhe tha se ai dhe Trump kanë një “strategji të përbashkët” për të ardhmen e Gazës.

Duke i bërë jehonë deklaratave të Trump, ai tha se “portat e ferrit do të ishin të hapura” nëse Hamasi nuk liron dhjetëra robër të mbetur të rrëmbyer në sulmin e tij të 7 tetorit 2023 që i parapriu luftës.

Deklaratat e liderëve erdhën vetëm dy javë para përfundimit të fazës së parë të armëpushimit në luftën e Izraelit në Gaza, e cila ka vrarë më shumë se 61,700 palestinezë.

Faza e dytë – në të cilën Hamasi do të lirojë dhjetëra robër të mbetur në këmbim të më shumë të burgosurve palestinezë, një armëpushim të qëndrueshëm dhe tërheqjen e forcave izraelite – ende nuk është negociuar.

Dhe Rubio tha se Hamasi “nuk mund të vazhdojë si një forcë ushtarake apo qeveritare”.

“Për sa kohë që qëndron si një forcë që mund të qeverisë ose si një forcë që mund të administrojë ose si një forcë që mund të kërcënojë me përdorimin e dhunës, paqja bëhet e pamundur”, ka thënë Rubio. “Ai duhet të çrrënjoset”. /Telegrafi/