Legjenda holandeze, Ruud Gullit ka thënë se Pep Guardiola po dështon ta fitojë Ligën e Kampionëve pasi nuk e ka në skuadër Lionel Messin.
Guardiola ka fituar dy trofe të Ligës së Kampionëve me Barcelonën, i pari në sezonin 2008-09, ndërsa i dyti 2010-11.
Megjithatë, katalunasi ka dështuar ta fitojë trofeun me Bayern Munichun për tri vite dhe tani me Manchester Cityn, ku u eliminua në fazën e çerekfinale nga Tottenhami.
Gullit ka vënë në dukje mungesën e Messit si arsyen e vërtetë pse Guardiola nuk arriti të fitojë trofeun me skuadrën gjermane dhe angleze.
Messi dhe Guardiola kanë fituar shumë trofe së bashku (Foto: David Ramos/Getty Images/Guliver)
"Është për shkak se ai nuk ka Messin. Kjo bën një ndryshim të madh", ka thënë fillimisht Gullit për beIN SPORTS.
"Ai u përpoq ta bënte atë me Bayern Munichun. Ai ishte afër çdo herë, por nuk mund ta bënte atë."
"Fitimi i kampionatit të Bundesligës në Munih nuk është më arritje sepse ata fitojnë pothuajse çdo vit".
"Unë e di se Pep dëshiron Ligën e Kampionëve dhe ndihem keq për të", përfundoi holandezi. /Telegrafi/
