PSD e vendos fotografinë e Ivanoviqit para Qeverisë, Molliqaj e krahason Kurtin me Enver Hoxhën

Partia Socialdemokrate (PSD), në një aksion simbolik të mërkurën, ka vendosur një fotografi të ish-politikanit serb në Kosovë, Oliver Ivanoviq, në oborrin e Qeverisë.

Kryetari i PSD-së, Dardan Molliqaj, para mediave ka thënë se deklarata e kryeministrit Albin Kurti Kurtit në përvjetorin e vrasjes së Ivanoviqit është skandaloze, e papranueshme dhe “qëllim kryesor e ka desubjektivimin e njeriut”.

Ai tutje është shprehur se kryeministri javë më parë i ka quajtur ekstremistë 9 mijë qytetarë serbë të Kosovës vetëm pse nuk i konvertonin targat ilegale të Serbisë në RKS.

Ndërsa tani sipas tij, kreu i ekzekutivit e ka nderuar dhe vlerësuar lart figurën e Ivanoviqit, “një person që ka qenë përgjegjës për shpërnguljen dhe urdhërdhënie të ekzekutimit të qytetarëve të Kosovës gjatë luftës dhe pas luftës”.

“Pse ndodh kjo? Ndodh sepse kryeministrit të Kosovës në idenë e vet të madhe për vetën dhe për Kosovën i lejohet të bëjë githçka. Një gjë të tillë e kanë bërë pushtetet totalitare më herët”, ka thënë Molliqaj duke e krahasuar Kurtin me komunistin Enver Hoxha.

“Ju e mbani mend, dikush edhe ka lexuar, se si Enver Hoxha i shpallte tradhtarë ata që e kundërshtonin Jugosllavinë e kur u prishte vetë me Jugosllavinë të njëjtit i shpallte heronj”, ka shtuar kreu i PSD-së.

Ndryshe, në 5 vjetorin e vdekjes së Ivanoviqit, kryeministri Kurti e ka ngritur lart figurën e politikanit serb. Kjo ka sjell reagime të shumta në shoqëri, duke pasur parasysh se ky i fundit ishte gjykuar e dënuar nga EULEX-i për krime lufte ndaj shqiptarëve.

Kurti përmes një videomesazhi ka thënë se Ivanoviqi ka qenë “një person i përkushtuar për të luftuar për interesat e komunitetit dhe qytetit të tij në Mitrovicë ndërsa këtë e ka bërë duke qenë i hapur, i sinqertë, gjithmonë i mprehtë në çështjet me rëndësi, por edhe i respektueshëm edhe ndaj atyre me të cilët nuk ishte dakord”. /Telegrafi/