Trajneri i Azerbajxhanit, Gurbanov: Kosova ishte më e fortë, fitoi me meritë kundër nesh

Kosova ka shënuar një fitore madhështore gjatë mbrëmjes së kaluar në kuadër të Ligës së Kombeve.

Përfaqësuesja jonë ka deklasuar në stadiumin Fadil Vokrri kombëtaren e Azerbajxhanit me rezultat 4-0.

Pas takimit ka folur trajneri i ekipit mysafir, Gurban Gurbanov, duke uruar ekipin tonë tha se ishte një fitore e merituar e “Dardanëve”.

“Urime për ekipin kombëtar të Kosovës për një fitore të merituar. E dija fuqinë e kundërshtarit, por erdhëm këtu me dëshirën për të fituar. Duhej të fitonim. Goli i pranuar në minutat e para ishte një goditje për lojtarët tanë. Pothuajse çdo goditje e tyre përfundoi me një gol”.

“Unë nuk do t’i kritikoj lojtarët. Ne kemi bërë një rrugë të gjatë së bashku. Gjithkush e donte fitoren. Por sot ne kemi mësuar fuqinë e vërtetë të një kundërshtari. Mund të them vetëm fjalë të mira për Kosovën. Unë nuk dua ta shoqëroj humbjen me asgjë. Kosova ishte më e fortë se ne”.

Lexo po ashtu Gjithçka që ndodhi në ndeshjen KOSOVË 4-0 Azerbajxhan

“Kam thënë shumë herë se ne kemi nevojë për të përmirësuar kampionatin tonë, për të rritur potencialin e lojtarëve. Tani është e vështirë të thuhet se çfarë na pret. Nuk do të mund që t’i përgjigjem kësaj pyetjeje për një kohë”, tha Gurbanov.

Kosova pas kësaj fitore del prej fazës së grupeve si lidere, ku në gjysmëfinale për kualifikim të kampionatit evropian të vitit 2020, do të takohet me Maqedoninë. /Telegrafi/

Lexo po ashtu Brenda zhveshtores së Përfaqësueses - festa e merituar e një triumfi madhështor