Nazmi Gripshi pas çmimit të fituar nga Telegrafi: Faleminderit për vlerësimin, jam shumë i lumtur për këtë çmim

Mesfushori me tipare sulmuese i Ballkanit, Nazmi Gripshi ka thënë se ndihet shumë i lumtur dhe i vlerësuar me çmimin e dhuruar nga portali Telegrafi si “Lojtari i vitit 2023”.

Redaksia e Sportit në Telegrafi, portalit lider në vend, ka shpallur fituesit e çmimeve për lojtarët më të mirë të Superligës së Kosovës në futboll për vitin 2023.

Çmimi kryesor, si më i miri i vitit i ka takuar mesfushorit sulmues të Ballkanit, Nazmi Gripshi.

Lexo po ashtu Telegrafi Sport zgjedh më të mirët e vitit 2023 në Superligën e Kosovës

Ylli me prejardhje nga Durrësi ishte padyshim më i miri te Ballkani në vitin e fundit, ku fituan titullin kampion dhe siguruan kualifikimin në grupet e Ligës së Konferencës.

Gripshi gjatë vitit 2023 ishte i papërmbajtshëm duke luajtur plot 42 ndeshje. Ai në këto ndeshje shënoi 11 gola, duke dhuruar 9 asistime në të gjitha garat.

Pasi pranoi çmimin, Gripshi u deklarua shumë i lumtur me vlerësimin, teksa e cilësoi një arritje të madhe personale, por edhe një vit me arritje të mëdha ekipore.

Lexo po ashtu Nazmi Gripshi, “Lojtari i vitit” nga Telegrafi Sport

“Faleminderit për gjithë në vlerësim që më ka bërë Telegrafi që më ka zgjedhur lojtarin më të mirë të vitit, ju falënderoj gjithëve ju këtu edhe jam i lumtur për këtë çmim”, ka thënë fillimisht Gripshi pas marrjes së çmimit.

“Për këtë vit që kemi bërë një arritje shumë të madhe, përsëri kemi hyrë në grupet e Konferencë Ligës, kemi dalë kampionë dhe mendoj se është një vit i suksesshëm si për Ballkanin edhe për mua si individualisht”, përfundoi mesfushori shqiptar. /Telegrafi/