Nadal tërhiqet nga ndeshja e parë në ATP Cup si pasojë e lëndimit

Zhvillim i rëndësishëm në ditën e parë të këtij edicioni të ‘ATP Cup 2021’. Tenisti numër dy në botë, spanjolli Rafael Nadal, ka njoftuar përmes rrjeteve sociale se nuk do të marrë pjesë në ndeshjen debutuese në ATP Cup të Spanjës kundër australianit Alex De Minaur.

Vitin e kaluar Nadal dhe De Minaur ishin protagonistët e një ndeshjeje spektakolare pikërisht në ATP Cup, me spanjollin që triumfoi pas tre seteve shumë të luftuara – transmeton SuperSport.

Tani do të ketë ndryshim programi për ndeshjet midis Australisë dhe Spanjës, që do të vijojnë me përplasjen mes numrave 2 të vendeve respektive, John Millman dhe Pablo Carreno Busta, ndërsa Roberto Bautista do të zëvendësojë 20 herë fituesin e titujve Grand Slam në përballjen me De Minaur.

“Përshëndetje të gjithëve! Kam vendosur bashkë me ekipin tim që të mos luaj ndeshjen time të parë sot për ATP Cup”.

“Jam i detyruar ta humb këtë përballje për shkak të një problemi në shpinë dhe shpresoj të jem më i mirë për garën tjetër, të enjten. Ne kemi një ekip të fortë, i uroj më të mirën Pablo Carreno Bustas”, ka sqaruar Nadal në një mesazh në rrjetet sociale.