Qualcomm dhe prodhuesit e telefonave Android punojnë drejt zhvillimit të veçorisë të “komunikimit të mesazheve me satelitë”

Qualcomm Inc gjatë së hënës tha se po punon me një grup të kompanive të telefonave të mençur Android për të shtuar aftësitë e komunikimit të mesazheve me satelitë në pajisjet e tyre.

Kompania me bazë në San Diego të Kalifornisë, e cila është edhe furnizuesi më i madh në botë për çipat të cilët i lidhin telefonat mobil me rrjetet “wireless”, tha se është duke punuar me Honor, Motorola, Nothing, Oppo, Vivo dhe Xiaomi Corp, për zhvillimin e këtyre pajisjeve.

Komunikimet e bazuara në satelit mund të dërgojnë dhe të marrin të dhëna në rajone të largëta ose rurale ku rrjetet e tjera të telekomunikimit nuk janë në dispozicion.

Qualcomm njoftoi se po shtonte këto aftësi në çipat e tyre nga ky vit, raporton Reuters, transmeton Telegrafi.

Bashkëpunimi i Qualcomm me prodhuesit e pajisjeve Android ka gjasa që të ngritë konkurrencën në mes të atyre markave dhe Apple, markë kjo e cila vitin e kaluar e kishte prezantuar veçorinë e cila lejonte dërgimin e mesazheve emergjente satelitore si një nga veçoritë kryesore të linjës më të re të iPhone-ëve.

Ata iPhone të ri përmbajnë një çip nga Qualcomm, edhe pse Apple për Reuters kishte deklaruar se ato telefona përmbajnë edhe harduer dhe softuer të personalizuar që janë pronë e Apple.

Qualcomm nuk tha se kur do të viheshin në dispozicion veçoritë e reja të mesazheve satelitore nga markat e telefonave të mençur Android të bërë publik gjatë së hënës.

Ata thanë se disa nga telefonat Android do t’i kenë të integruara këto veçori nga gjysma e dytë e këtij viti. /Telegrafi/