Qytetarët ankohen se laboratorët privatë po i “detyrojnë” t’i bëjnë nga dy testime për COVID-19

Këshilli për Mbrojtjen e të Drejtave dhe Lirive të Njeriut ka pranuar rreth 20 ankesa nga qytetarët e Kosovës lidhur me ofrimin e shërbimeve për testime për COVID-19, në institucionet shëndetësore private.

Ankesat kanë të bëjnë me mungesën e dhënies së informacioneve për qytetarët rreth llojllojshmërisë së testeve.

Ata ankohen se në mungesë të informacioneve, qytetarët po detyrohen t’i bëjnë disa lloje të testeve për të vërtetuar se a kanë virus në trupin e tyre apo jo.

Por edhe çmimet me të cilat po ofrohen për këto testime po konsiderohen të papërballueshme për xhepin e qytetarëve.

Valentina Demolli nga Këshilli për Mbrojtjen e të Drejtave dhe Lirive të Njeriut, thotë për KosovaPress se tashmë çmimi i testimeve për një individë po shkon edhe deri në 70 euro.

Ajo ka kërkuar nga ministria e Shëndetësisë që të bëjnë monitorim strikt se si po u ofrohen qytetarët për kryerjen e testeve për COVID-19 në institucionet private.

“Sidomos këtë javë kemi pranuar goxha shumë ankesa prej qytetarëve të Kosovës. Në bazë të ankesave që kemi pranuar nga disa qytetarë, në këto laboratore fillimisht po u ofrohet një testim prej 20 eurosh dhe i cili nuk po vërteton nëse e ke aktiv virusin apo jo. Më pas sipas deklarimeve të qytetarëve, përmes ankesave në KMDLNJ, atyre po u thuhet që përveç kësaj do të duhej të bëhej edhe testi tjetër që vërteton nëse e ke virusin aktiv apo jo – që shkon në vlerë prej 50 euro. Vetëm në dy javët e fundit diku rreth 20 ankesa që kemi pranuar prej qytetarëve që kanë të bëjmë me testimet në institucionet private, për të cilat po pohohet se ka mungesë të informacionit”, tha ajo.

Demolli tha se edhe ashtu çmimi i ofrimit të këtyre shërbimeve në laboratorët privatë është i lartë marrë parasysh edhe gjendjen e ekonomive familjare pas periudhës së pandemisë.

Ajo këshillon që sidomos për familjet me asistencë sociale të ofrohen këto testimet serologjike dhe PCR pa pagesë.

Se çmimet për të bërë një test serologjik janë të larta dhe të papërballueshme për standardin jetësor të qytetarëve të Kosovës e thotë edhe udhëheqësi i Organizatës joqeveritare “Konsumatori”, Selatin Kaçaniku.

Ai thotë se e rrugës do të ishte që testeve edhe për laboratorët privatë të ofroheshin falas nga qeveria e Kosovës, ndërsa qytetarët të paguanin vetëm shërbimin që bëhet në institucionet private shëndetësore.

Por, kryetari i Autoritetit Kosovar të Konkurrencës, Valon Prestreshi ka thënë për KosovaPress se ka një nivel të kënaqshmërisë sepse ka konkurreshmëri të çmimeve nëpër laboratorët privatë të licencuar.

Në 90 laboratorët e licencuar nga Ministria e Shëndetësisë për të kryer testime për coronavirus, në disa prej tyre ku tashmë kanë nisur të kryhen testet aerologjike, çmimet variojnë nga 15 deri në 35 euro, varësisht nga numri i testeve për antitrupa. Kurse, ato molekulare sillen nga 65 deri në 80 euro. /KP/Telegrafi/