KE i FFK-së mbajti mbledhjen e radhës, diskutohet për rezultatet e Përfaqësueses së Kosovës

Komiteti Ekzekutiv i Federatës së Futbollit të Kosovës ka mbajtur mbledhjen e radhës.

Temë diskutimi në këtë mbledhje kanë qenë rezultatet e Përfaqësueses së Kosovës asaj A dhe për gropmoshat U21.

FFK ka raportuar se nuk ka pasur sukses te A-ja dhe U21, por që duhet konsolidim i tyre në vazhdim.

Gjithashtu KE i FFK-së ka analizuar edhe rrjedhën e garave në të gjitha rangjet.

Njoftimi i plotë nga FFK (pa ndërhyrje):

Komiteti Ekzekutiv i FFK-së sot mbajti mbledhjen e vet të radhës nën drejtimin e presidentit Agim Ademi. Në këtë mbledhje KE analizoi rrjedhën e garave në të gjitha rangjet dhe kategoritë me konstatimin se garat po zhvillohen sipas dinamikës së paraparë dhe deri më tash vërehet me ngritje të cilësisë, shtim në organizim dhe rivalitet sportiv.

KE analizoi paraqitjet e ekipeve të Kombëtares “A” dhe asaj U21, që nuk mund të flitet për ndonjë sukses, por që duhet një konsolidim i tyre në vazhdim.

KE shqyrtoi dinamikën e riorganizimit e licencimit të Lidhjeve Rajonale të Futbollit (LRF) e ku u tha se nevojitet strukturimi dhe organizim i tyre profesional e sportiv në harmoni me Aktet Normative të FFK-së dhe nevojat që i shtron koha si domosdoshmëri për zhvillimin e futbollit të Kosovës.

KE mori vendim që të vazhdohet me investimet dhe punimet në selinë e FFK-së, në Kampin Nacional në Hajvali dhe Obiliq.

KE shqyrtoi edhe Kërkesat dhe Parashtresat drejtuar këtij organi. /Telegrafi/