Historia do të flasë për Prishtinën...

 Plisat e kishin mbushur palestrën e Pallatit të Rinisë dhe Sporteve për ta motivuar dhe përkrahur skuadrën e tyre të zemrës drejt titullit që iu kishte ikur nga duart në dy vitet e fundit.

Pejanët e udhëhequr nga kapiteni Valdet Grapci e nisën mjaft mirë lojën duke krijuar menjëherë një epërsi prej shtatë pikëve(2-9), mirëpo kjo gjë e nxiti Dardan Berishën që t’i shënojë dy trepikësha të njëpasnjëshëm për ta ngushtuar disavantazhin në vetëm një pikë. Mysafirët e mbajtën këtë epërsi deri në fund të çerekut të parë i cili përfundoi me rezultat 21-22.

Edhe çereku i dytë iu takoi pejanëve, pasi prishtinasit dukeshin të humbur në parket duke bërë gabime amatoreske që ndoshta edhe fëmijët në klasën e 8-të nuk i bëjnë. Ishte Samir Shaptahu ai i cili i udhëhoqi verdhezinjtë në këtë çerek, të cilin e përmbyllën me 10 pikë epërsi, 36-46.

Çereku i tretë nisi nën një ritëm më të lartë dhe më agresiv, teksa shihej një entuziazëm më i madh tek vendasit për ta barazuar rezultatin. Këtë gjë edhe e arritën përmes dy gjuajtjeve të lira të Berishës 4 minuta pa përfunduar ky çerek, me ç’rast Bardhekaltërit edhe kaluan në epërsi.

Kur kishin mbetur edhe disa sekonda deri në përfundim të kësaj pjesëloje, Berisha me mençuri e detyroi Valdet Grapcin ta bënte faulin e tij të pestë dhe të largohet nga loja, gjë që e dëmtoi rëndë skuadrën pejane për shkak të mungesës së një qendre tjetër. Në anën tjetër, Berisha i realizoi dy gjuajtjet e lira për t’u futur në çerekun e katërt me dy pikë epërsi, 56-54.

Çereku i katërt u takoi prishtinasve të cilët që nga fillimi i tij kontrolluan gjithçka dhe gradualisht deri në fund të ndeshjes përmes paraqitjes së shkëlqyer të Dardan Berishës me ndihmën e Alban Veselit dhe Edmond Azemit. Ndeshja përfundoi me rezultat përfundimtar, 74-65.

Më meritori për këtë triumf të Sigal Prishtinës padyshim se është Dardan Berisha me 30 pikë, i cili jo vetëm sonte por shkëlqeu gjatë tërë këtij edicioni për Bardhekaltërit.

/Telegrafi/