E mbylli me Juventusin, tre opsionet e Alex Sandros për ta vazhduar karrierën

Alex Sandro i ka dhënë fund aventurës te Juventusi pas nëntë viteve qëndrim te gjiganti italian.

Mbrojtësi veteran brazilian do të largohet nga Zonja e Vjetër më 30 qershor kur edhe i skadon kontrata, derisa ai nuk do të mbetet as në futbollin italian.

33-vjeçari ka tre destinacione të mundshme në horizontin e tij për ta vazhduar karrierën dhe ato janë Fenerbahçe, Besiktas dhe Santos.

Pas nëntë vitesh në Juventus, Alex Sandro ka lënë gjurmë të pashlyeshme, duke barazuar Pavel Nedved si lojtari i huaj me më shumë paraqitje në historinë e klubit, me gjithsej 327 paraqitje.

Lexo po ashtu Juventusi konsideron dy mbrojtës si pasues të Alex Sandros

Fenerbahçe dhe Besiktas, dy nga klubet më të mëdha të Turqisë, janë të interesuar për të marrë shërbimet e mbrojtësit 33-vjeçar.

Të dyja skuadrat shohin te Alex Sandro një mundësi për të forcuar skuadrat e tyre me një lojtar me përvojë të madhe ndërkombëtare dhe një histori të gjatë në garat evropiane.

Lexo po ashtu Futbollistët e padëshiruar të Juves ngarkojnë me 68 milionë euro buxhetin

Nga ana tjetër, si një opsion i mundshëm shfaqet edhe Santos, klubi ku Alex Sandro filloi karrierën e tij profesionale.

Një rikthim në Brazil mund t’i ofrojë atij mundësinë për të përfunduar karrierën e tij në atdhe dhe për të kontribuar përvojën e tij në ekipin ku ai lindi si futbollist. /Telegrafi/