Barcelona shkatërron Sevillan në finalen e Copa del Rey, fiton trofeun e parë sezonal

Barcelona ka fituar ndaj Sevillas me rezultat të thellë 5-0 në finalen e Copa del Rey e njohur ndryshe si Kupa e Mbretit.

Skuadra e Ernesto Valverdes ka fituar trofeun e parë këtë sezonal, pasi në finalen e mbajtur të Copa del Rey në Wanda Metropolitano e ka shkatërruar Sevillan duke e dominuar në çdo minutë të ndeshjes.

Goli i parë i ndeshjes erdhi në minutën e 14-të, ku Luis Suarez shënoi nga afërsia për 1-0 pas një kundërsulmi të shpejt dhe i asistuar në fund nga Philippe Coutinho.

Për epërsinë 2-0 u përkujdes ylli i skuadrës, Lionel Messi, i cili shënoi një gol të bukur pas asistimit maestral me thembër të Jordi Albas.

Pjesa e parë perfekte u mbyll me një gol tjetër të shënuar nga uruguaiani Suarez (40′), i cili shënoi për 3-0 pas asistimit të Messit dhe me këtë rezultat skuadrat shkuan në pushim.

Edhe pjesa e dytë foli e gjitha në të mirë të gjigantit katalunas, që përveç dominimit arriti t’i shënoj edhe dy gola për të thelluar edhe më shumë epërsinë.

Luhej minuta e 52-të e ndeshjes kur listës së golashënuesve iu shtua edhe kapiteni Andres Iniesta, i cili dribloi portierin kundërshtar për të shënuar për 4-0 pas asistimit të Messit.

Në minutën e 69-të të ndeshjes shënoi edhe Philippe Coutinho nga pika e bardhë për të quar epërsinë në 5-0.

Deri në fund të ndeshjes, loja u menaxhua mirë nga Blaugranët dhe në fund fituan me rezultat të thellë 5-0, duke fituar në fund trofeun e Copa del Rey, i cili ishte i 30-ti në histori të klubit nga Camp Nou. /Telegrafi/