Avokati i Valdrin Sahitit demanton raportimet se kreatori ndodhet në paraburgim në Turqi

Ditë më parë media të ndryshme online raportuan se dizenjatori Valdrin Sahiti është arrestuar në Stamboll me akuzat për posedim të lëndëve narkotike.

Ndërkohë, sot u tha se kreatori ndodhet në paraburgim në Turqi, raportime të cilat i ka mohuar avokati i tij Besnik Berisha.

Berisha tha se lajmet për paraburgim janë të rreme dhe si të tilla janë të obliguar që t’i denoncojnë.

“FAKE NEWS! Me shumë respekt për punën e secilit medium dhe koleg gazetar, lajmet e mëposhtme jemi të detyruar t’i denoncojmë si FAKE News sepse të tilla janë!Mos u besoni!”, ka shkruar Berisha.

Lexo po ashtu Flet avokati i Valdrin Sahitit: Lajmi për arrestimin e tij në Turqi është i pavërtetë, ai ndodhet në Dubai

“Për ata që e dinë, emri im për mua ka vlerë më shumë se çdo send tjetër, ndaj kur them diçka, mos e veni në dyshim”, ka shkruar avokati i Sahitit në një tjetër postim.

Ndërsa, kujtojmë që Berisha edhe në një prononcim për Telegrafin ka hedhur poshtë akuzat ndaj tij.

Berisha ka treguar se ka kontaktuar me Valdrinin dhe se stilisti nuk ndodhet i arrestuar në shtetin turk, por në Dubai të Emirateve të Bashkuara Arabe.

“Nuk janë të vërteta lajmet që kanë qarkulluar për Valdrinin sot. Ndaj tij nuk është inicuar asnjë precedent penal dhe nuk është ndaluar nga autoritetet turke. Ai ndodhet në Dubai, ku po vazhdon aktivitetet e tij biznesore”, tha Berisha për Telegrafin.