Dështimi për themelimin e Komisionit Hetimor për energjinë dhe shpërndarja e 100 eurove për sektorin publik dhe pensionistët – ngjarjet që karakterizuan javën në Kosovë

Dështimi për themelimin e Komisionit nga Kuvendi i Kosovës për hetimin e krizës energjetike, shpërndarja e 100 eurove për mbi 80 mijë punëtorët e sektorit publik dhe rreth 280 mijë pensionistët dhe hapja e periudhës për aplikim për subvencione për fermerët, ishin disa nga ngjarjet kryesore që karakterizuan ekonominë e vendit.

Në mungesë kuorumit, Kuvendi ka dështuar të formojë Komisionin Hetimor për krizën energjetike. Vetëm tre deputetë kanë marrë pjesë në votim të cilët abstenuan, ndërsa grupet tjera parlamentare u përmbajtën nga votimi, shkruan Telegrafi.

Në seancën e fundit të Kuvendit ishin diskutuar dy komisione hetimore për energjinë. Njëri u iniciua nga Partia Demokratike e Kosovës dhe është përkrahur Lidhja Demokratike e Kosovës dhe Aleanca për Ardhmërinë e Kosovës. Komisioni tjetër është propozuar nga partia në pushtet, Lëvizja Vetëvendosje (LVV).

Partitë opozitare kanë thënë se Komisioni i tyre do të analizonte të gjitha masat e marra prej periudhës së shpalljes së gjendjes emergjente për energjinë, për të cilën Kuvendi ka votuar në fund të vitit të kaluar, ndërsa Komisioni i propozuar nga LVV-ja do të hetonte më shumë çështje në sektorin e energjisë.

“Hetimi i investimeve kapitale në Korporatën Energjetike të Kosovës (KEK) në periudhën 2006-2022, investimet kapitale në distribucionin e energjisë elektrike pas privatizimit dhe burimet nga ku janë bërë ato investime”, ishin disa nga pikat e propozuara.

Lexo po ashtu Dështon votimi i komisionit hetimor për energjinë

LVV po ashtu pati propozuar të hetohen edhe punësimet e bëra nga viti 2006 deri në prill të këtij viti, kontratat e lidhura për blerje të energjisë elektrike nga viti 2006 deri më 2022, procedurat e ndjekura gjatë këtyre blerjeve dhe shumë çështje tjera në fushën e energjisë.

Qeveria e Kosovës gjatë të premtës ka miratuar kërkesën e Ministrisë së Financave, Punës dhe Transfereve për ndarjen e mjeteve buxhetore për zbatimin e Pakos së Ringjalljes Ekonomike për masën 3.6 – Mbështetja e likuiditetit familjar.

Sipas këtij vendimi, ndahen mjete buxhetore në shumë 7 milionë e 300 mijë euro, për zbatimin e pikës 1.4 të vendimit të Qeverisë të datës 13.04.2022, si masë për shtimin e mbështetjes për qytetarët e Kosovës, Masa 3.6 – Mbështetja e likuiditetit familjar të Pakos së Ringjalljes Ekonomike.

Mjetet e ndara do të merren nga nën-programi “Programi i Ringjalljes Ekonomike” dhe ndahen për zbatimin e shtesës prej 100 eurove për punonjësit e sektorit publik që marrin pagë nga buxheti i shtetit.

Lexo po ashtu ​Qeveria ndan shtesat 100 euro për punonjësit e sektorit publik

Ndërsa, ministri i Financave, Punës dhe Transfereve, Hekuran Murati ka njoftuar vlera prej 100 eurove tashmë është shpërndarë për rreth 280 mijë pensionistë.

Sipas Muratit, nga sot rreth 26 mijë familje në skemën e ndihmës sociale do të marrin dyfishin e vlerës.

“Me datën 15 prill, shtesa prej 100 euro u është shpërndarë rreth 280 mijë pensionmarrësve. Ndërsa sot, në kuadër të pakos mbështetëse, rreth 26 mijë familje në skemën e ndihmës sociale do të marrin dyfishin e vlerës, tashmë të rritur”, ka njoftuar Murati në Facebook.

Lexo po ashtu Ndarja e 100 eurove, Murati: Janë shpërndarë për rreth 280 mijë pensionistë

Pas hapjes për aplikim për punëtorët e sektorit privat, funksionalizimi i platformës për studentët do të ndodh shumë shpejt.

Qeveria kishte marr vendim që për muajin prill, pensionistëve, punëtorëve të sektorit privat e publik dhe studentëve do t’iu ndahen nga 100 euro.

Kjo masë në kuadër të Pakos së Ringjalljes Ekonomike, buxhetit do t’i kushtoj rreth 100 milionë euro dhe përfshinë mbi 800 mijë qytetarë.

Lexo po ashtu Ministria e Bujqësisë hap periudhën e aplikimit për subvencione

Ministria e Bujqësisë, Pylltarisë dhe Zhvillimit Rural gjatë javës ka hapur periudhën e aplikimit për pagesa direkte/subvencione për disa kultura dhe aktivitete bujqësore.

Periudha e aplikimit zgjatë 30 ditë kalendarike që nga dita e shpalljes publike, ndërkaq aplikimi për të përfituar subvencione bëhet në zyrat e Drejtorive Komunale për Bujqësi.

Të gjitha informatat e hollësishme për kriteret dhe dokumentacionin e nevojshëm për aplikim, fermerët mund t’i marrin në web faqen e MBPZHR-së, www.mbpzhr-ks.net dhe në web faqen e AZHB-së, www.azhb-ks.net, si dhe në Drejtoritë Komunale për Bujqësi. /Telegrafi/