Nënkampioni i Kosovës, Trepça, vetëm një javë pas humbjes, ka treguar se nuk do të dorëzohet për sezonin e ardhshëm, duke rinovuar me trajnerin dhe yjet e skuadrës.  

Trajneri Lubomir Minchev do të jetë në krye të KB Trepçës edhe për sezonin 2022/23.

Klubi nga Mitrovica, ka njoftuar të mërkurën se ka arritur marrëveshje me Minchevin edhe për një vit.

Krahas trajnerit Minchev, Trepça për edicionin e ri ka zyrtarizuar edhe dy yjet e skuadrës Drilon Hajrizi dhe Amin Hot. Të dy ishin ndër më të dalluarit në sezonin e fundit.

Bullgari Minchev e mori drejtimin e Trepçës para fillimit të edicionit 2021/22 dhe e udhëhoqi drejt sukseseve.

Ai arriti të triumfojë në Kupën e Kosovës, sukses ky që i ka munguar Trepçës prej vitit 2012, ndërsa mitrovicasit arritën deri në finale të pley-offit të Superligës për t’u mposhtur nga Golden Eagle Ylli në këtë seri me rezultatin 3-1.

Skuadra mitrovicase luajti edhe në finalen e turneut të Superkupës së Kosovës, ku pësoi nga Ponte Prizreni. /Telegrafi/