Shakira rrezikon të dënohet me burg në Spanjë për shkak të mospagimit të tatimeve

Këngëtarja kolumbiane, Shakira, është vënë në shënjestër të autoriteteve spanjolle, të cilët pohojnë se ajo nuk ka paguar tatim në periudhën 2011-2014.

Tashmë kanë nisur hetimet ndaj 40-vjeçares, ndërsa nëse shpallet fajtore, atëherë do të duhet të paguajë disa miliona euro.

Për më shumë, përveç gjobës me para, ajo mund të përfundojë edhe prapa grilave.

Burimet pranë këngëtares thonë se ajo do të mbrohet në gjykatë me faktin se në Spanjë ka qëndruar më pak se 183 ditë në vit, ashtu që, sipas ligjit, nuk duhet të paguajë tatim për përfitimet në vendet tjera të botës.

Nga ana tjetër, autoritetet pohojnë se është fjala për mashtrim me tatime dhe se Shakira duhet të paguajë tatim nga të gjitha përfitimet, si ato të fituara brenda Spanjës, ashtu edhe ato jashtë këtij vendi.

Këngëtarja jeton zyrtarisht në Spanjë nga viti 2015, ndërsa është e martuar me futbollistin spanjoll, Gerard Pique.

Në muajt e fundit, Shakira ka pasur probleme me kordat vokale, saqë është dashur ta anulojë turneun e saj.

Mjekët e kanë këshilluar këngëtaret që të pushojë, në mënyrë që t’i shërohen kordat vokale, para se të nisë mbajtjen e koncerteve të tjera. /Telegrafi/