Pse transferimi i Calafiorit në Arsenal nuk është ende i kryer?

Burime të shumta të mediave raportojnë se Riccardo Calafiori ka rënë dakord për kushtet personale me Arsenalin, por Bologna ende nuk e ka pranuar ofertën e Topçinjve.

Italiani Calafiori është në prag të bashkimit me Arsenalin, por klubi i mbrojtësit italian, Bologna, ende nuk e ka dhënë dritën jeshile.

Sipas Il Corriere dello Sport, Arsenali nuk e ka arritur ende çmimin e kërkuar prej 50 milionë eurosh nga klubi Rossoblu. Ata janë afër, por ende nuk kanë arritur marrëveshje, kështu që negociatat mes dy klubeve duhet të vazhdojnë.

Gazeta Tuttosport shton se bonuset do të zhbllokojnë marrëveshjen, duke lejuar Calafiorin të bashkohet me Arsenalin. Italiani pritet të nënshkruajë një kontratë me 4 milionë euro në vit deri në qershor 2029.

Calafiori duket i destinuar të bashkohet me Arsenalin gjithsesi, dhe Gazzetta dello Sport raportoi të premten se 22-vjeçari do të përfundonte një lëvizje në Emirates Stadium për rreth 53 milionë euro, përfshirë bonuset.

Bologna nuk ka dhënë ende dritën jeshile, por Arsenali është skuadra më e mirë e pozicionuar për të nënshkruar me Calafiorin këtë verë. /Telegrafi/