Pas humbjes turpëruese nga Bayern Munichu në Lisbonë, Lionel Messi nisi duelin e tij më të fundit me udhëheqësinë e Barcelonës. Ai kërkoi përmes faksit që ta lejonin të largohej, por në fund vendosi të qëndronte deri në fund të kontratës për të shmangur ndonjë përballje në gjykatë me klubin.

“Do të qëndroj te Barcelona dhe qëndrimi im nuk do të ndryshojë, sepse kam dashur të largohem. Do të jap më të mirën. Gjithmonë dua të fitoj, jam konkurrues dhe kurrë nuk më pëlqen që të humb”, kishte thënë argjentinasi për Goal.

Kjo deklaratë ishte dëshmi, se përkundër se e pati të pamundur të largohej, Messi e fitoi edhe një duel me klubin, kur kihet parasysh ndryshimet mëdha që u bënë para fillimit të sezonit të ri. Situata të ngjashme kanë ndodhur edhe në të kaluarën dhe superylli ka dalë gjithmonë fitues.

Nga Rijkaard te Guardiola në vitin 2008

(Foto: Clive Brunskill/Getty Images/Guliver)

Sezoni i fundit i Frank Rijkaard si trajner i Barcelonës (2007/2008) ishte ndoshta më i keqi në karrierën e Messit me katalunasit.

Blaugranët përfunduan në vend të gjashtë në La Liga, u eliminuan në gjysmëfinale të Ligës së Kampionëve nga Manchester Unitedi dhe u përjashtua nga Kupë e Mbretit nga Valencia që asokohe drejtohej nga Ronald Koeman.

Presidenti i atëhershëm, Joan Laporta, i mbijetoi mocionit për mosbesim, ndërsa Leo shkoi në Kinë për ta fituar medaljen e artë me Argjentinën në Lojërat Olimpike.

Kur u kthye te Barcelona, erdhi Pep Guardiola, i cili ndryshoi gjithçka duke bërë revolucion me largimin e yjeve, si Ronaldinho e Deco.

Në sezonin pasueses (2008/2009), Messi shënoi 38 gola dhe dhuroi 18 asistime, Barcelona e fitoi La Ligan, Kupën e Mbretit dhe Ligën e Kampionëve – tripletën e parë në histori, ndërsa argjentinasi e fitoi edhe Topin e Artë.

Nga Tata Martino te Luis Enrique në vitin 2014

(Foto: Denis Doyle/Getty Images/Guliver)

Pos Superkupës së Spanjës, skuadra e Tata Martinos nuk fitoi trofe të tjera në sezonin 2013/2014.

Atletico Madridi i mposhti në garën për titullin e Spanjës dhe i eliminoi nga Liga e Kampionëve, kurse Real Madridi i mposhti në finale të Kupës së Mbretit.

Në verën e vitit 2014, bordi i Barcës ishte i preokupuar me çmimin e transferimit të Neymarit, ndërsa Messi e kërkoi largimin nga klubi.

Një bashkëbisedim me Tito Vilanovan e bindi numrin 10 të qëndronte dhe kjo ishte gjë e mirë. Luis Enrique u caktua si pasues i Martinos dhe i largoi nga skuadra lojtarët, si Cesc Fabregas e Alexis Sanchez, ndërsa e solli Luis Suarezin.

Sulmi i njohur si MSN i solli një tjetër tripletë Barcelonës, ndërsa Messi shënoi 58 gola dhe dhuroi 29 asistime në të gjitha garat, duke e fituar Topin e Artë para Cristiano Ronaldos.

Situata aktuale

(Foto: David Ramos/Getty Images/Guliver)

Barcelona dhe Messi u gjetën në situatë të ngjashme në fillim të sezonit 2020/2021. Pas trazirave dhe ndryshimeve të mëdha në klub para fillimit të sezonit të ri, argjentinasi u konsiderua si pjesë e rëndësishme e projektit të Koeman, i cili u angazhua në vend të Quique Setien.

Skuadra e holandezit i ka predispozitat për t’i përjetuar sukseset e ekipeve të Guardiolas dhe Luis Enriques që kishin kaluar nëpër situata të ngjashme.

Tashmë nga skuadra janë larguar emra, si Ivan Rakitic, Arturo Vidal e Luis Suarez, ndërsa pritet të shihet se cili do të jetë intervenimi i madh në treg.

/Telegrafi/