Inter dhe Olympique Marseille kanë arritur një marrëveshje totale për transferimin e Joaquin Correa, i cili do t'i nënshtrohet nesër (e premte) testeve mjekësore me skuadrën e Ligue 1.
Sulmuesi 29-vjeçar argjentinas është duke u larguar nga kryeqyteti i Lombardisë pas një periudhe dy-vjeçare jo bindëse, pasi iu bashkua nga Lazio në një marrëveshje me vlerë rreth 30 milionë euro.
Correa shënoi vetëm 10 gola dhe pesë asistime në 77 paraqitje në të gjitha garat për Interin, duke mos lënë shenj në skuadrën e Simone Inzaghit.
Sipas gazetarit Gianluca Di Marzio, Interi tani ka arritur një marrëveshje totale me Marseille për shitjen e Correas, i cili pritet të kalojë në një marrëveshje huazimi me një detyrim të kushtëzuar prej 15 milionë euro.
Në anën tjetër është Alexis Sanchez, i cili do të kthehet te Nerazzurrët pas një viti në kampionatin francez te Marseille.
Sulmuesi 34-vjeçar kilian u largua nga klubi si lojtar i lirë muajin e kaluar, pasi kishte shënuar 18 gola në 44 paraqitje në total. /Telegrafi/
