Ky është sezoni i fundit përpara se ndryshimet drastike në Ligën e Kampionëve të hyjnë në fuqi

Pas katër raundeve të ndeshjeve në sezonin 2023/24, faza e grupeve e Ligës së Kampionëve po i afrohet fundit.

Real Madrid, Bayern Munich dhe Manchester City kanë rezervuar tashmë vendet e tyre në raundet e eliminimit dhe duket se do të kryesojnë grupet e tyre në sezonin e fundit të fazës së grupeve me katër ekipe. Pas turneut të këtij viti do të ketë disa ndryshime të mëdha në strukturën e Ligës së Kampionëve, me sistemin aktual të zëvendësuar nga një tabelë e vetme e ligës me të gjitha 36 skuadrat në garë.

Është një ndryshim i madh për kompeticionin numër një të klubeve evropiane të futbollit. Më poshtë keni një vështrim se si do të ndodhin këto ndryshime në 2024/25.

Job done ✔️#UCL pic.twitter.com/8BNfNXnkhu

— UEFA Champions League (@ChampionsLeague) November 8, 2023

Si funksionon aktualisht Liga e Kampionëve

Të enjten e 31 gushtit 2023, UEFA zhvilloi shortin vjetor të Fazës së Grupeve për Ligën e Kampionëve të UEFA-s. 32 skuadrat kualifikuese u ndanë në tetë grupe me nga katër skuadra.

Para pushimit dimëror të garës, secila skuadër do të luajë dy herë me kundërshtarët e grupit, një herë në shtëpi dhe një herë jashtë. Dy skuadrat e para të secilit grup kalojnë në raundin e 16-të; skuadrat e vendit të tretë do të kalojnë në Ligën e Evropës. Tetë skuadrat që përfundojnë në fund të grupeve të tyre do të eliminohen nga garat evropiane për sezonin.

Lexo po ashtu Nga Man City te Interi dhe PSG, përditësohen shanset e secilin klub për të fituar Ligën e Kampionëve

Sa skuadra janë në formatin e ri të Ligës së Kampionëve?

Megjithatë, kjo është gati të ndryshojë. Formati i ri për Ligën e Kampionëve të UEFA-s përmban katër ekipe të tjera, duke e çuar numrin e përgjithshëm në 36, të gjitha në një ligë të vetme.

Brenda kësaj lige skuadrat do të ndahen në katër vazo me nga nëntë. Vazo një do të ketë fituesit në fuqi të Ligës së Kampionëve, së bashku me tetë klubet me koeficientët më të mirë.

Si do të funksionojë formati i ri në Ligën e Kampionëve?

Gjatë raundit të parë të garës 2024/25 do të zhvillohen tetë ndeshje për çdo klub; katër në shtëpi dhe katër jashtë.

Faza e grupeve do të përfundojë në fund të janarit, në vend të dhjetorit. Në fund të tetë raundeve, tetë skuadrat e para do të kualifikohen drejtpërdrejt në raundin e 16-të. Skuadrat nga vendi i 9-të deri në vendin e 24-të do të luajnë në një raund kualifikues me dy ndeshje. Skuadrat e mbetura do të eliminohen.

Nga raundi i 16-të e tutje gara do të vazhdojë në të njëjtin format si në vitet e mëparshme, me nokaut me dy ndeshje që çojnë në një finale me një përballje.

Lexo po ashtu Katër ekipe shtesë do të kualifikohen në Ligën e Kampionëve nën formatin e ri që nis nga sezoni 2024/25

Pse quhet modeli zviceran?

Emri, çuditërisht, vjen nga shahu. Në një turne shahu të sistemit zviceran, lojtarët renditen në tabelën e ligës, pavarësisht se nuk luajnë kundër çdo konkurrenti tjetër. E njëjta gjë pritet të ndodhë edhe në Ligën e Kampionëve.

Në Ligën e Kampionëve me pamje të re, skuadrat do të luajnë dy ndeshje – një në shtëpi dhe një jashtë – kundër kundërshtarëve nga secila prej katër vazove. Kjo siguron që, ndërsa jo të gjithë do të luajnë me njëri-tjetrin, ata do të kenë pasur një grup afërsisht të barabartë prej tetë ndeshjesh kundër ekipeve me cilësi të ndryshme.

Nga 2024/25 skuadrat kryesore të kontinentit do të mund të takohen në fazën e grupeve të Ligës së Kampionëve.

Si do të vendosen skuadrat në listën e ndeshjeve?

Në sezonin 2024/25 skuadrat do të luajnë ndeshjet e fazës së grupeve kundër kundërshtarëve nga e njëjta vazo me to. Kjo do të thotë se ne mund të shohim Bayern Munich dhe Manchester City duke luajtur kundër njëri-tjetrit në fazën e grupeve, një perspektivë që nuk ka gjasa në formatin aktual.

Çdo ekip në fazën e grupeve të Ligës së Kampionëve do të përballet me dy skuadra nga vazo 1, dy nga vazo 2, dy nga vazo 3 dhe dy nga vazo 4.

Pse UEFA ka ndryshuar formatin?

Formati i ri, sipas UEFA-s, është ” i dizajnuar për të siguruar të ardhmen pozitive të futbollit evropian në çdo nivel dhe për të përmbushur nevojat në zhvillim të të gjithë akterëve të tij”.

Finalja e Ligës së Kampionëve 2024/25 do të mbahet në Allianz Arena në Mynih më 31 maj 2025.

Këto ndryshime rrënjësore nuk kufizohen vetëm në Ligën e Kampionëve. Si Liga e Evropës ashtu edhe Liga e Konferencës do të kalojnë gjithashtu në Modelin Zviceran në vitin 2024.

Kapaciteti i tyre do të rritet nga 32 në 36, ashtu si në Ligën e Kampionëve. Në Ligën e Evropës do të zhvillohen tetë ndeshje në fazën e grupeve, por vetëm gjashtë në Ligën e Konferencës. /Telegrafi/