Arsenali ka fituar me rezultat 4-2 ndaj Leicester Cityt në ndeshjen e vlefshme për javën e dytë në Ligën Premier.

Ekipi i Mikel Artetas ka marrë edhe fitoren e dytë këtë sezon, duke triumfuar pa shumë vështirësi ndaj Leicester Cityt në Emirates.

Pjesa e parë e ndeshje u karakterizua me dominim të vendasve, të cilët përveç rasteve arritën t’i shënojnë edhe dy gola.

Ishte sulmuesi i ardhur në verë, Gabriel Jesus, i cili shënoi fillimisht golin e parë personal në minutën e 23-të pas asistimit të Granit Xhakës për 1-0, ndërsa në minutën e 35-të braziliani shënoi për 2-0.

Në pjesën e dytë, u zhvillua lojë më e barabartë, me të dyja skuadrat që shënuan nga dy gola.

Reklama

Të parët që gjeten rrjetën ishin mysafirët, por me anë të mbrojtësit William Saliba (53’) që shënoi autogol për 2-1.

Reklama

Megjithatë, gëzimi i tyre zgjati vetëm dy minuta pasi në skenë doli mesfushori shqiptar Xhaka, i cili pas asistimit të Jesus shënoi për 3-1 nga afërsia.

Në minutën e 74-të ishte James Maddison që ngushtoi epërsinë në 3-2, por vendasit gjeten edhe një gol me anë të Gabriel Martinellit (76’), i cili vulosi fitoren me rezultat përfundimtar 4-2.

Pas kësaj fitore, Arsenali e sheh veten në pozitën e dytë me gjashtë pikë, ndërsa Leicesteri renditet i 14-ti me vetëm një pikë.

Reklama

Në ndeshjen e ardhshme, Topçinjtë luajnë në udhëtim te Bournemouth, ndërsa Dhelprat e presin Southamptonin. /Telegrafi/