Të shtënat në Alabama kanë lënë të vdekur shtatë persona, përfshirë një fëmijë

Katër persona kanë vdekur nga të shtënat në një klub nate në Birmingham, SHBA, ndërsa tre të tjerë kanë vdekur nga disa të shtëna tjera jashtë një shtëpie në qytet, përfshirë një fëmijë të vogël, ka njoftuar policia në Alabama.

Bëhet e ditur se oficerët iu përgjigjën menjëherë një raporti për shumë njerëz të qëlluar jashtë një klubi nate në Bllokun 3400 të 27th Street North, deklaroi oficeri i departamentit të policisë së Birminghamit, Truman Fitzgerald.

Personeli i zjarrfikësve dhe shpëtimit në Birmingham shpalli një person të vdekur në një trotuar pranë klubit të natës.

Ndërsa, dy gra u shpallën të vdekura brenda klubit, shkruan the Guardian, përcjell Telegrafi.

Një burrë tjetër u shpall i vdekur në Universitetin e Alabamës në spitalin e Birminghamit, ku të paktën nëntë viktima të tjera po trajtoheshin për plagë me armë zjarri.

Siç raportohet, viktimat janë transportuar nga personeli mjekësor i urgjencës për në spital.

Hetuesit besojnë se të paktën një i dyshuar qëlloi në klubin e natës nga rruga.

Autoritetet federale të zbatimit të ligjit po ndihmojnë policinë e Birminghamit me hetimin.

Ndryshe, policia iu përgjigj edhe një tjetër thirrjeje për aksident automjeti në bllokun 1700 të Indian Summer Drive në Birmingham.

Policia gjeti një veturë brenda së cilës ndodheshin një burrë, një grua dhe një djalë i vogël që besohet se ishte vetëm pesë vjeç, të cilët kishin pësuar plagë me armë zjarri.

Zjarrfikësit e Birmingham shpallën të tre të vdekur në vendngjarje.

Hetuesit besojnë se ata ishin viktima të shtënave, përpara se i dyshuari të ikte me një automjet. /Telegrafi/