Produktet nën sanksione vazhdojnë të arrijnë në Rusi

Eksportet e Bashkimit Evropian në Rusi kanë rënë me dy të tretat që nga fillimi i luftës në Ukrainë, por produktet nën sanksione e gjejnë rrugën e tyre në tregun rus përmes vendeve të tjera, sipas një analize nga instituti ekonomik gjerman ifo.

Vëllimi i eksporteve të BE-së në Rusi është ende i madh, ndër të tjera, sepse vetëm 32 për qind e produkteve janë të mbuluara me sanksione, shpjegon zëvendësdrejtoresha e qendrës ifo për ekonominë ndërkombëtare, Feodora Teto.

“Kur bëhet fjalë për mallra luksoze, sanksionohet eksporti i shampanjës në Rusi, por jo i prosekos”, thotë Teto.

Kësaj i duhet shtuar mundësia e eksportit përmes vendeve të treta, vëren ifo, duke iu referuar analizës së bazës së të dhënave.

Kina zuri vendin e parë në renditjen e furnizuesve të produkteve nën sanksione, me një pjesë të importeve prej 61 për qind. Në vitin 2021, ishte vetëm 35 për qind. Pjesa e Turqisë u rrit në 13 për qind, nga vetëm tre për qind në vitin 2021, zbuloi instituti gjerman.

Rusia aktualisht prokuron produkte të sanksionuara edhe nga Armenia, ndonëse një përqindje modeste. Në të njëjtën periudhë, megjithatë, eksportet e BE-së u dyfishuan drejt Armenisë. /Telegrafi/