Objektivi kryesor i verës për Tottenhamin ka një tatuazh të Arsenalit në krahun e tij

Tottenham raportohet se ka identifikuar objektivin e tyre kryesor për të përforcuar mesfushën gjatë afatit kalimtar veror, por thuhet se ekziston një skenar ku mund të jetë i përfshirë edhe Arsenali.

Ange Postecoglou ka kompletuar një numër marrëveshjesh që prej se u emërua trajner i Spurs verën e kaluar, ani pse shumica prej tyre ishin në mbrojtje dhe në sulm.

Sipas revistës portugeze Record, raportohet se Spurs kanë shfaqur interesim për të nënshkruar me mesfushorin e Sporting Lisbonës, Morten Hjulmand.

Reprezentuesi danez kishte nënshkruar për Sportingun pas një aventure në Serie A tek Lecce, të cilët përfituan një shifër në regjionin e 18 milionë eurove për shitjen e lojtarit. Raporti tutje pretendon se Tottenhami e ka përcjellur mesfushorin tash e disa muaj, ndërsa shefi i skautëve së fundmi e ka monitoruar atë në gjysmëfinale të Kupës ndaj Benficës.

Por, revista portugeze gjithashtu ka raportuar se mesfushori ka një tatuazh të Arsenalit në krahun e tij, pasi ai ka qenë tifoz i klubit anglez që kur ishte fëmijë.

“Kur fillova të shikoja futboll, Arsenali kishte një skuadër fantastike dhe Patrick Vieira ishte kapiteni dhe luante në mesfushë. Ai ishte dhe është, një inspirim i madh për mua”, kishte thënë Hjulmand më herët gjatë këtij sezoni.

Hjulmand ka shënuar dy gola dhe ka bërë dy asistime deri në këtë fazë të sezonit në elitën e futbollit portugez, ndërsa Sporting Lisbona pozicionohet në vendin e dytë në renditje./Telegrafi/