Klubi francez, AS Monaco ka njoftuar se Cesc Fabregas do të largohet kur t’i skadojë kontrata në fund të qershorit.

Spanjolli iu bashkua skuadrës franceze nga skuadra e Ligës Premier, Chelsea në janar 2019, por ka luftuar me lëndime këtë sezon në Stade Louis II.

Monaco tani ka konfirmuar se 35-vjeçari do të largohet nga klubi pas tre vitesh e gjysmë, posa kontrata e tij të përfundoj në fund të këtij muaji.

Njoftimi i Monacos erdhi me anë të faqeve zyrtare.

“Mesfushori me më shumë se 830 ndeshje në karrierë, kontrata e të cilit po përfundon, largohet nga klubi i Principatës tre vjet e gjysmë pas ardhjes së tij”, thuhej në njoftim.

Fabregas nuk e ka ndërmend të pensionohet, pasi synon të luajë në sezonin e ardhshëm, por nuk dihet se ku do ta vazhdoj karrierën.

35-vjeçari në të kaluarën ka luajtur edhe me Barcelonën dhe Arsenalin. /Telegrafi/