MKRS investon 1.2 milion euro për 12 fusha ndihmëse të futbollit

Në kuadër të investimeve kapitale në infrastrukturën fizike sportive në Kosovë, do të ndërtohen 12 fusha ndihmëse për klubet e Superligës në futbollin e Kosovës.

Këto investime do të realizohen në qytetet e Prishtinës, Prizrenit, Pejës, Mitrovicës, Gjilanit, Podujevës, Skenderajt, Drenasit, Gjakovës dhe Vitisë.

Ministri i Kulturës, Rinisë dhe Sportit, Kujtim Gashi, bashkë me kryetarin e Federatës së Futbollit të Kosovës, Fadil Vokrri, është takuar me krerët e komunave, klubet e të cilave zhvillojnë garat e tyre në Superligën e Kosovës në futboll.

Në këtë projekt MKRS-ja do të investojë 1.2 milion euro, nga 100 mijë euro për secilën fushë ndihmëse, thuhet në njoftimin e Ministrisë.

Ky investim kapital në tërësi do të ketë vlerën e tre milionë eurove, ku FFK-ja do të investojë në secilën fushë ndihmëse nga 120 mijë euro ndërsa komunat përkatëse do të investojnë nga 30 mijë euro në këto fusha. Një fushë ndihmëse do të ketë vlerën financiare prej 250 mijë eurosh.

Për projektet në fjalë do të nënshkruhet memorandum bashkëpunimi tri palësh MKRS-FFK-Komunat, dhe kjo gjë pritet të ndodh në ditët në vijim, ku do të përshkruhen edhe detajet e projektit.

Ministri Gashi e ka vlerësuar si shumë të rëndësishëm këtë bashkëinvestim, sepse do të krijojë hapësira të reja për zhvillimin e ushtrimeve dhe përgatitjen e futbollistëve dhe do të mundësojë ruajtjen e terreneve të stadiumeve. /Telegrafi/