Liverpooli ka marrë një fitore tejet të rëndësishme në garë për titullin e kampionit, teksa ka mposhtur Burnleyn 4-2.

Mysafirët kanë arritur që të kalojnë të parët në epërsi vetëm pas gjashtë minutash lojë.

Ishte mesfushori qendror i Burnleyt, Westwood që realizoi një gol spektakolar nga goditja e këndit për ta kaluar skuadrën e tij në epërsi 0-1.

Përgjigja e vendasve nuk vonoi shumë pasi në minutën e 19-të barazuan rezultatin në 1-1, nëpërmjet brazilianit Firmino që shënoi nga afërsia.

Dhjetë minuta më vonë Liverpooli e gjeti edhe golin e epërsisë në këtë sfidë.

Roberto Firmino. (Foto: Michael Regan/Getty Images/Guliver)

Sadio Mane realizoi një gol të bukur duke kaluar skuadrën e Klopp në epërsi për herë të parë në këtë takim.

Me epërsinë e vendasve prej një goli 2-1, përfunduan 45 minutat e para të kësaj sfide.

Liverpooli edhe pjesën e dytë ishte më e mirë në fushë dhe arriti të realizonte golin e tretë në minutën e 67-të

Mohamed Salah goditi dhe topin e kthyer në zonë e shfrytëzoi Roberto Firmino që shënoi për 3-1.

Krejt në fund të ndeshjes, Burnley arrit të realizonte edhe golin e dytë nëpërmjet islandezit Gudmundson.

Sadio Mane. (Foto: Michael Regan/Getty Images/Guliver)

Derisa Burnley u hodh në sulm për ta barazuar rezultatin, Liverpooli ndërtoi një kundërsulm të shpejtë ku shënoi edhe golin e katërt.

Ishte sulmuesi senegalez Sadio Mane që realizoi për rezultatin përfundimtar 4-2.

Liverpool pas kësaj fitore vazhdon të mbetet në pozitën e dytë në tabelë me 73 pikë të tubuara, një më pak se lideri Manchester City.

Ndërkohë Burnley ndodhet në pozitën e 17-të me 30 pikë pas 30 ndeshjeve. /Telegrafi/