Na ndiqni në dy llogaritë tona në Twitter, Telegrafi.com dhe Telegrafi Sport.

Ka përfunduar xhiro e tetë në elitën e futbollit kosovar BKT Superligë.

Kryendeshja e kësaj jave është zhvilluar në qytetin e Gjilanit, ku Drita dhe Prishtina luajtën baras 0-0.

Ballkani është rikthyer në vendin e parë pas një fitore spektakolare 3-2 ndaj Drenicës me rikthim. Llapi ka marrë fitoren e parë në kampionat pas triumfit 1-0 ndaj Dukagjinit, teksa me të njëjtin rezultat ka triumfuar edhe Feronikeli përballë Ulpianës.

Takim shumë interesant u zhvillua edhe në Malishevë, ku Malisheva dhe Gjilani luajtën baras 1-1.

Si gjithnjë redaksia e sportit në portalin Telegrafi.com zgjedh më të mirët e javës në BKT Superligë.

Portieri:

Ardit Nika ka qenë fantastik në derbin ndaj Dritës. Edhe pse u luajt një ndeshje e zbehtë, Nika bëri tri pritje vendimtare duke shpëtuar Prishtinën nga humbja.

Mbrojtja:

Armend Thaqi ishte më i miri i javës i zgjedhur zyrtarisht nga FFK. Mbrojtësi anësor i Ballkanit shkëlqeu ndaj Drenicës, ku përveç lojës së mirë arriti të shënonte edhe një gol.

Në qendër vjen Bujar Idrizi i Llapit së bashku me Azem Bejtën e Feronikelit. Dy mbrojtësit ishin më të dalluarit në skuadrat e tyre që morën nga tri pikë si vendas. Përveç lojës së mirë defensive nga dy lojtarët, Idrizi i Llapit asistoi edhe tek goli i fitores.

Edhe krahu i majtë i mbrojtjes është i rezervuar për një futbollist të Ballkanit dhe një tjetër me mbiemrin Thaqi. Përveç Armendit, edhe Astrit Thaqi zhvilloi një ndeshje të madhe ku realizoi edhe gol në fitoren 3-2 ndaj Drenicës.

Mesfusha:

Rron Broja ka qenë futbollisti më i mirë në fushë në duelin Drita – Prishtina. Mesfushori mitrovicas dominoi në mesfushë, derisa vlen të përmendet edhe rasti kur shpëtoi një gol, duke larguar topin e rikthyer nga Leotrim Kryeziu.

Drilon Leku u përkujdes për tri pikët e reja të Feronikelit. Mesfushori i talentuar shënoi golin e vetëm ndaj Ulpianës dhe përveç golit bëri edhe ndeshje shumë të mirë.

Gol vendimtar këtë javë shënoi edhe mesfushori meksikan i Llapit, Franco Rivera. 27-vjeçari është bërë pikë referimi i Llapit këtë edicion, pasi vazhdimisht shënon ose asiston.

Sulmuesit:

Yoan Marc Olivier çdo javë po tregon cilësitë e tij të jashtëzakonshme. Anësori i Malishevës ishte më i miri në fushë edhe në duelin me Gjilanin, ku realizoi golin e vetëm të Malishevës.

Skuadra e tij humbi 3-2, por Kreshnik Uka ishte futbollisti më i mirë në fushë. Sulmuesi drenicas shënoi dy gola, ku i pari ishte i jashtëzakonshëm nga distanca.

Në krahun e majtë të sulmit ndodhet braziliani i Gjilanit, Elton Cale. 33-vjeçari që dy ndeshje radhazi po fiton penallti dhe po rikthen formën e tij të vjetër. Braziliani përveç lojës së mirë po tregohet edhe vendimtar për Gjilanin.

Trajneri i javës:

Bekim Isufi merr epitetin e trajnerit të javës së tetë në Superligë. Edhe pse skuadra e tij ishte duke humbur 0-2, Isufi falë taktikës së tij dhe zëvendësimeve që hodhi në fushë arriti të rikthejë gjithçka në favor dhe ta marrë një fitore të madhe. /Telegrafi/