Deja Vu i Kosovës ndaj Hungarisë, njëjtë si me Lituaninë – çereku i tretë fatal

Kosova ka pësuar humbjen e dytë në kuadër të rrethit të parë të kualifikimeve për Botërorin, Kina 2019 në basketboll ndaj Hungarisë me rezultat 84-76.

Ndeshja u zhvillua në Fonix Hall të Debrecenit në një atmosferë mjaft të mirë të krijuar nga rreth pesë mijë shikues.

Ishte kjo një ndeshje përafërsisht e njëjtë sikur me Lituaninë, ku dy çerekat e parë ishin shumë të fortë për përfaqësuesen tonë.

Kosova e përfundoi me fitore çerekun e parë duke udhëhequr me një pikë dhe pikërisht me një pikë epërsi shkoi në fund të pjesës së parë në zhveshtore, duke shfrytëzuar dominancën e Lis Shoshit në një mbrëmje ku Dardan Berisha nuk arriti të tregojë impaktin e pritur.

Mbrojtja zonale e Kosovës u tregua efektive ashtu sikurse sulmi me splits që nxirrnin në pozitë shënimi Lis Shoshin, për të cilin kundërshtarët nuk patën përgjigje – deri në çerekun e tretë.

Pikërisht në çerekun e tretë hungarezët shfrytëzuan kalimin e Kosovës në mbrojtjen “man to man”, prej ku edhe realizuan seri spektakolare me disa treshe radhazi, ku Kosova vuajti edhe mungesën e lojtarëve kualitativ nga stoli. Nga ana tjetër, Hungaria bënte presion mbi Lis Shoshin me dy lojtarë shtatëgjatë, kurse Dardan Berisha nuk po gjente hapësirën, ku Vojvoda i Hungarië me përvojën arriti të mbyllte anën e preferuar të Dardanit, anën e djathtë.

Më i miri te Hungaria ishte pikërisht Vojvoda me 20 pikë, ku realizoi tri treshe dhe realizio 7 kërcime e pesë asistime.

Performancë të mrekullueshme shfaqën edhe Wittman me 20 pikë dhe Allen me 15 pikë e 9 kërcime.

Te Kosova më i miri ishte Scott Bamforth me 21 pikë, 5 kërcime e 4 asistime, kurse ai u përcoll nga Lis Shoshi me double double prej 16 pikë e 11 kërcimesh. Dardan Berisha shtoi vetëm 22 pikë, ku nga tri pikë ishte vetëm 20 për qind i saktë, duke qëlluar dy herë nga 10 tentime.

Kosova tash në Grupin C mbetet në vendin e fundit me dy humbje nga dy ndeshjet, kurse Polonia dhe Hungaria kanë nga një fitore dhe ndajnë pozitat dy dhe tre, kurse Lituania ka gozhduar pozitën e parë me dy fitore nga dy ndeshjet e para.

Tri skuadrat nga grupi kualifikohen në rrethin e dytë, kurse Kosovës do t’i duhen tash performanca të forta në shtëpi ndaj Hungarisë e Polonisë, ashtu sikurse një fitore potenciale ndaj Polonisë në udhëtim.

/Telegrafi/