Çka u kërkua më së shumti në Google në vitin 2023?

Gjiganti teknologjik Google ka nxjerr përmbledhjen vjetore apo “Year in Search 2023” të asaj se çfarë është kërkuar më shumti nga njerëzit në motorin e saj të kërkimit.

Lufta mes Izraelit dhe Hamasit kryeson në listën e kërkimeve të lajmeve për vitin 2023, sipas të dhënave globale të Google, duke pasuar me rastin e nëndetëses eksploruese të Titanikut që shpërtheu në muajin qershor së bashku me personat në bord, dhe në vendin e tretë renditet rasti tragjik i tërmeteve vdekjeprurëse në Turqi dhe Siri, transmeton Telegrafi.

Në listën e njerëzve më të kërkuar në Google për vitin 2023, Damar Hamlin zuri vendin e parë, i ndjekur nga Jeremy Renner dhe Andrew Tate.

Për sa i përket listës së personave që ndërruan jetë këtë vit, emri i Mathew Perry ishte në krye, pasuar me Tina Turner dhe Sinead O’Conner.

Në kategorinë e aktorëve më të kërkuar në Google, Jeremy Renner ka zënë pozitën e parë, ndjekur nga Jenna Ortega dhe Ichikawa Ennosuke IV. Ndërsa, në kategorinë e sportistëve më të kërkuar në Google, Damar Hamlin është në krye të listës, pasuar nga Kylian Mbappe dhe Travis Kelce.

Në botën e video-lojërave, Hogwarts Legacy ka fituar titullin e lojës më të kërkuar, pasuar me The Last of Us dhe Connections. Ndër filmat, “Barbie” është ai më i kërkuari, pasuar nga “Oppenheimer” dhe “Jawan.”

Shakira është këngëtarja më e kërkuar në Google, bazuar në statistikat e gjigantit teknologjik, e ndjekur nga Jason Aldean dhe Joe Jonas.

Për seritë televizive, “The Last of Us” ka fituar titullin e serisë më të kërkuar, derisa në vendin e dytë listohet seria e njohur Wednsday; në vendin e tretë qëndron “Ginny and Georgia”. /Telegrafi/