Toure i gatshëm të luajë për Unitedin për vetëm një funte në javë

Mesfushori i Manchester Cityt, Yaya Toure, është i gatshëm të luajë për klubin rival, Manchester United, në mënyrë që t’ia dëshmojë Pep Guardiolas se po gabon rëndë me të.

Strategu spanjoll e shiti mesfushorin gjatë kohës sa ishte trajner i Barcelonës, ndërsa edhe pasi e mori drejtimin e Cityt ka pasur mosmarrëveshje me lojtarin nga Bregu i Fildishtë, sidomos duke e lënë jashtë ekipit të Ligës së Kampionëve në sezonin 2016/2017.

Asokohe agjenti i futbollistit, Dimitri Seluk, e konsideroi turpërues vendimin e trajnerit të ekipit nga Etihad Stadium.

Toure e gjeti sërish veten jashtë skuadrës në sezonin 2017/2018 duke luajtur vetëm në 10 ndeshje të Ligës Premier në sezonin e kaluar.

Lexo po ashtu Të gjitha lajmet për Yaya Toure

Në fund të këtij muaji, 35-vjeçarit i skadon kontrata me Cityn dhe ai ka konfirmuar se do të largohet, ndërsa ekziston mundësia që të luajë për klubin rival nga qyteti i Mançesterit.

Seluk ka thënë se Toure është i gatshëm të luajë për një funte (1.14 euro) në javë për cilindo nga top klubet e Ligës Premier duke përfshirë edhe Djajtë e Kuq.

“Yaya ka marrë shumë oferta nga vende të ndryshme, oferta me para të majme, mirëpo kemi vendosur që sezonin e ardhshëm t’ia dedikojmë Guardiolas”.

“T’ua dëshmojmë tifozëve të Manchester Cityt se Yaya nuk ka mbaruar me futbollin. Ai ka forcë të madhe dhe energji, dhe dëshiron të luajë në Angli këtë sezon”.

“Në kohën kur klubet angleze shpenzojnë shuma të mëdha parash për lojtarët, unë zyrtarisht deklaroj se Yaya është i gatshëm të transferohet te cilido nga gjashtë top-klubet angleze si lojtar i lirë me një pagë javore prej një funte . Me kusht që sistemi i bonusit të bazuar në sukses të jetë aktiv”.

“Mendoj se një lojtar si Yaya do të ishte i mirë për klubet, si Arsenali, Chelsea, Man Utd, Tottenhami apo Liverpooli. Yaya është një fitimtar”, ka thënë Seluk për sport24. /Telegrafi/