“Shpirtin ta kam dhanë”, këngë për dashurinë që nuk vdes kurrë

Nuk thuhet kot se dashuria është diçka e brendshme dhe vjen vetvetiu. Dikush e quan marrëzi, kurse shumica shpëtimtarja dhe balancuesja e shpirtrave. Vetëm ai që ka dashuruar e njeh magjinë dhe dhembjen e saj

Nisur nga kjo nuk ka lindur kot vargu i poetit ‘me e dashtë, nuk do të thotë edhe me e pasë (Ah, sa dashuritë lindin dhe vdesin brenda njeriut).

Pikërisht, enigmës së quajtur dashuri, i ka kënduar me aq pasion edhe këngëtari i gjeneratës së artë, Mentor Mripa, i cili i frymëzuar nga legjenda e baladave kroate, ka shqipëruar këngën e tij duke bërë që kjo perlë muzikore të përjetohet edhe nga dëgjuesit tanë.

Mripa i ka ndenjur besnik tekstit, vijës melodike dhe ka ruajtur të gjitha tiparet e një balade e cila ngërthen në vete të gjitha krajatat e një dashurie të parealizuar.

Zaten, siç del edhe nga kënga, dashuritë e mëdha nuk realizohen kurrë, prandaj, mbesin mistere, transmeton Telegrafi.

Duke iu referuar një poeti tjetër, ai të dashurës së vet i përgjërohet: “Rri larg dhe e paarritshme. Arritja jote nuk më duhet asgjë, ta dashuroj shpirtin dhe jo fizikun”.

Ne të gjithë kemi vuajtur për dashurinë, dhe me siguri do të vuajmë përsëri. Ndarja është diçka që nuk është e lehtë për askënd, por kjo është arsyeja pse muzika është aty për të ndihmuar.

Kënga është sikur një lament për të gjithë ata triumfues dhe dështues të dashurisë.

Dashuria i mund të gjitha, kjo këngë ua tregon rrugën se si duhet ruajtur dhe rigjetur dashurinë. Me një fjalë, është një porosi sublime, mos e humbni njeriun e zemrës që pastaj ta përjetoni vuajtjen e Dantes.

Dëgjim të këndshëm dhe dashuroni pa fund, ndonëse dashuria nuk i njeh rregullat dhe nuk përfill logjikën.

Dhe kur fjalët të mbarojnë, kjo këngë nostalgjike le të shërojë plagët tuaja të dashurisë.

/Telegrafi/