Shënohet ditëlindja e 58-të e Fadil Vokrrit, në stadiumin ku legjenda bëri emër do të ndriçojë përgjithmonë emri i tij

Fadil Vokrri po të ishte sot në mesin tonë do të festonte ditëlindjen e 58-të, por ai ka ndërruar jetë para disa javësh, duke lënë një mungesë të madhe në botën e futbollin shqiptar.

Sot ditëlindja e tij është shënuar me disa aktivitete duke filluar me ndeshjen në stadiumin “Zahir Pajaziti” në Podujevë, ku u takuan veteranët e Prishtinës dhe ata të Llapit.

Për Prishtinën luajti edhe djali i legjendës, ndërsa te Llapi luajti vëllai i tij.

Pastaj tifozët e Kosovës që njihen me emrin “Dardanët” kanë bërë disa koreografi të veçanta për nderim të figurës së ish presidentit  Fadil Vokrri.

Fillimisht ata ishin të pranishëm te varri i tij ku lëshuan qindra balona më një baner ku shkruhej: “Përjetësisht bashkë”.

Pastaj në orët e mbrëmjes në një ceremoni ku ishte i pranishëm edhe i pari i FFK-së, Agim Ademi u zbulua edhe emri i stadiumit.

Stadiumin i qytetit të Prishtinës tashmë  do ta mbajë me mburrje emrin e legjendës “Fadil Vokrri”.

Me fishekzjarrë dhe dritat në stadium ku shkruhej emri i tij, u mbyll shënimi i ditëlindjes së 58-të të legjendës.

Stadiumi do të hapet me 28 korrik në ora 20:00. /Telegrafi/