“Rrugët” seriali i parë i zhanrit aksion dramë në Kosovë fillon së transmetuari të enjten

“Rrugët” është seriali i radhës vendor që do të transmetohet të enjten në Klan Kosova. Ai është edhe seriali i parë i zhanrit policesk në Kosovë, derisa në të do të trajtohen tema aktuale nga realiteti i shoqërisë kosovare derisa aktori dhe regjisori i njohur Halil Budakova rikthehet fuqishëm në skenë me një prodhim ndryshe

Aktori dhe regjisori i mirënjohur kosovar, Halil Budakova pritet që t’i rikthehet fuqishëm ekraneve televizive nesër, pasi që seriali i tij më i ri “Rrugët” do të fillojë së transmetuari sonte (e enjte) mbrëma në televizionin “Klan Kosova”.

“Rrugët” ka për personazhe kryesore karakterin e Jetonit që luhet nga aktori tashmë i dëshmuar në disa projekte kinematografike Halil Budakova, që është një polic hetues i krimeve të rënda në Kosovë, i cili është në ndjekje të antagonistit, Zahos që luhet tashmë nga aktori i njohur Enver Petrovci. Zaho është kryemafiozi i qytetit të Prishtinës.

Jetoni është njeri prej atyre policëve që punon me orare të tejzgjatura për t’ia siguruar jetën qytetarëve të Kosovës, gjë e cila i shkakton probleme të mëdha edhe në familje – pasi që puna e tij rezulton me shkurorëzim e tij nga gruaja Mimoza,

Pos kësaj seriali “Rrugët” trajton edhe tema të tjera që po ndodhin aktualisht në Kosovë, shkruan Express.

Dhuna në familje, rastet e së cilës janë bërë përditshmëri në Kosovë, trajtohen përmes karakterit të Njomzës që do të luhet po ashtu nga aktorja tashmë e njohur Merita Budakova, e cila luan rolin e një arsimtareje të Gjeografisë.

Rroni (Oltion Budakova), djali i Jetonit, është po ashtu njëri prej karaktereve kryesore në këtë serial. Përmes tij paraqiten kryesisht problemet që ekzistojnë me drogën nëpër shkolla, shitjen marijuanës dhe devijimin në rrugë jo të mira të tinejxherëve kosovarë.

“Rrugët” është njëri prej serialeve që përmban një ekip të madhe të aktoreve profesionist dhe të njohur në filmin kosovar si: Sevdai Radogoshi, Vilson Spaqi Alban Makolli, Vedat Haxhiislami, Adem Zhitopotoku, Besfort Daka, Faik Gashi, Anisa Ismaili, Shota Baraliu, Adriana Mehmeti, Aida Alidemi, Mevlan Saraqi, ,Veton Osmani, Kenan Gurgurovci, etj.

Halil Budakova në këtë serial vjen edhe si regjisor derisa skenari i serialit është shkruar nga Ardian Jasiqi dhe Alban Makolli.

Efektet speciale dhe muzika në këtë film janë punuar nga Gëzim Hazrollaj derisa drejtor i fotografisë është Dardan Sadiku.