Presidenti i Lega Serie A premton ‘skanerë fytyre’ për të luftuar racizmin

Presidenti i Lega Serie A, Luigi De Siervo, zbuloi planin për të futur sistemet e njohjes së fytyrës në të gjitha klubet e ligave më të larta në mënyrë që të luftohet racizmi në futboll.

Serie A është detyruar të dalë me një përgjigje pasi portieri i Milanit, Mike Maignan u keqtrajtua në mënyrë racore në pjesën e parë të ndeshjes si mysafir ndaj Udineses në fundjavë. Ai u largua për pak kohë nga fusha dhe më vonë shkroi një status duke i bërë thirrje ‘të gjithë sistemit të marrë përgjegjësinë’.

Maignan mori mbështetje të gjerë nga bota e futbollit dhe incidenti ndezi sërish bisedën në lidhje me masat e pamjaftueshme për të luftuar racizmin në futboll, duke bërë që autoritetet në Itali të fillojnë të kërkojnë zgjidhje.

Lexo po ashtu Ndërpritet për disa minuta ndeshja mes Udineses dhe Milanit, shkak koret raciste në drejtim të Maignan

Duke folur për Corriere della Sera përmes Calciomercato.com, De Siervo diskutoi planet e Serie A për të luftuar racizmin në futboll.

“Plani është që të pajisen stadiumet e të gjitha skuadrave të regjistruara në Serie A me sisteme mbikëqyrjeje me video të aftë për të skanuar fytyrat e atyre që hyjnë në stadium në hyrje, duke i lidhur me të dhënat personale të pranishme në bileta, në mënyrë që të gjurmohen menjëherë për identitetin e tifozëve”.

Lexo po ashtu E ofenduan me kore raciste, reagon Maignan: Dëgjova njerëzit duke më quajtur ‘majmun’, nuk mund të vazhdojmë kështu

“Pavarësisht krizës ekonomike si pasojë e COVID-it, mungesës së vullnetit të lojtarëve për të ulur qoftë edhe pjesërisht pagat e tyre, shpresoj se do të mund të investojmë në këtë teknologji. Kostot janë të konsiderueshme, por shpresa është që të aprovojmë projektin deri në fund të këtij sezoni”, ka thënë De Siervo.

Racizmi ka vazhduar të jetë një problem në futbollin italian vitet e fundit dhe si Lega Serie A ashtu edhe FIGC janë kritikuar ashpër për përgjigjet e tyre përgjithësisht të dobëta dhe të pamjaftueshme. /Telegrafi/