Enea Koliçi mund të largohet nga Kukësi për një aventurë në Francë.

Portieri që shkëlqeu në sezonin e fundit, duke fituar për herë të parë titullin kampion, ka marrë një ofertë konkrete me një pagë shumë joshëse.

“Panorama Sport” zbulon se skuadra e njohur franceze, Auxerre, që militon në Ligën e Dytë, i ka ofruar 12 mijë dollarë në muaj portierit pogradecar. Koliçi po kalon një moment të shkëlqyer në karrierën e tij dhe kampionati i fundit e konfirmoi më së miri.

Portieri ka një meritë të padiskutueshme në titullin e Kukësit, pasi gjatë kampionatit u bë shumë herë protagonist me pritjet e tij, duke shpëtuar në mënyrë të veçantë skuadrën në ndeshjet ndaj rivalëve direktë.

Reklama

Ofertat për portierin janë shtuar së tepërmi dhe mësohet se ai që po punon për transferimin e tij jashtë Shqipërisë është ish-lojtari i Kombëtares, Edvin Murati, i cili bashkë me vëllanë e tij, prej vitesh udhëheqin një kompani të njohur menaxhimi për lojtarë.

Reklama

Nga sa mësohet, kontrata e portierit me Kukësin është edhe për Kupat e Evropës. Kësisoji, aktivizimi në Champions me fanellën e verilindorëve do të jetë një bonus më tepër për pogradecarin.

Shanset që ai të rinovojë me Kukësin janë të pakta, megjithatë çdo gjë mbetet për t’u parë, edhe pse oferta e francezëve është shumë e lartë. Paga që Koliçi ka marrë te kampionët në fuqi të Shqipërisë është disa herë më e vogël në krahasim me ofertën që ka bërë Auxerri.

Reklama

Drejtuesit e Kukësit duhet të mendojnë seriozisht për rinovimet, pasi pjesës dërrmuese të grupit aktual i përfundon kontrata në muajin korrik.

Bëhet fjalë për titullarë shumë të rëndësishëm, që kanë mbajtur peshën më të madhe në skuadër në sezonin më të mirë të historisë së Kukësit.

Reklama