Përqindja fituese dhe titujt e Kloppit në krahasim me trajnerët tjerë të Liverpoolit

Jurgen Klopp tashmë ka hyrë në historinë e Liverpoolit si njëri prej trajnerëve të suksesshëm, duke qenë se pas Ligës së Kampionëve, është shumë pranë që ta fitojë edhe kampionatin e Anglisë, të cilin Redsat për herë të fundit e kanë fituar para tri dekadash.

Prej se e mori skuadrën nga Brendan Rodgersi në vitin 2015, strategu gjerman e ka fituar Ligën e Kampionëve, Superkupën e Evropës dhe Kupën e Botës për Klube, si edhe ka luajtur në finale të një tjetër edicioni në Ligën e Kampionëve, pastaj në Ligën e Evropës dhe në Kupën e Ligës.

Sigurimi i titullit të Ligës Premier do ta bënte atë një prej trajnerëve më të suksesshëm në histori të klubit.

Përqindja fituese e Kloppit si trajner i Liverpoolit

Gjermani e ka drejtuar Liverpoolin në 256 ndeshje në të gjitha garat duke i fituar 155 prej tyre (60.5 për qind) dhe në këtë mënyrë është bërë trajneri i katërt më i suksesshëm në këtë aspekt.

Dy trajnerët me përqindje më të mira janë Reuben Bennett dhe John McKenna, i pari me 75 për qind fitore dhe i dyti 69.4 për qind. Mirëpo, Bennett e ka drejtuar skuadrën vetëm katër ndeshje, kurse McKenna vetëm 36 ndeshje.

Sa u përket trajnerëve që e kanë drejtuar Liverpoolin më shumë se 50 ndeshje, përpara Kloppit është vetëm Sir Kenny Dalglish, i cili në 307 ndeshje ka arritur 187 fitore (60.9 për qind).

Ndërsa vlen të përmendet legjenda Bill Shankly, i cili gjatë 15 viteve i fitoi 407 nga 783 ndeshjet që i drejtoi (52 për qind).

Trajneri i Liverpoolit me më së shumti trofe

Bob Paisley i ka fituar 14 trofe të mëdha gjatë nëntë viteve si trajner i Liverpoolit, duke përfshirë gjashtë tituj kampionalë dhe tri kupa evropiane. Në fakt, këta gjashtë tituj e vënë atë përpara të gjithë trajnerëve të tjerë.

Shankly ka fituar tre tituj kampionalë, dy Kupa FA dhe një Kupë UEFA. Po ashtu, ai e ka fituar edhe titullin e ligës së dytë në vitin 1962. Dalglish i ka fituar pesë trofe të mëdha gjatë gjashtë viteve, po aq sa Houllier.

Klopp tash për tash qëndron me tre, ndërsa nëse Liverpooli e fiton titullin e kampionit të Anglisë, atëherë me katër trofe do ta kalojë Joe Faganin, i cili i ka fituar vetëm tre. /Telegrafi/