Me gjithë gafën dhe kaosin që shkaktuan vitin e kaluar, Warren Beatty dhe Faye Dunaway do ta ndajnë përsëri çmimin për filmin më të mirë, në ceremoninë e ndarjes së çmimeve Oscar.
Në vitin e kaluar, dy aktorët hynë në histori të Academy Awards duke e shpallur fitues filmin e gabuar.
(Foto: Getty Images)
Kujtojmë se në edicionin e 89-të të evenimentit më të madh botëror të filmit, Beatty dhe Dunaway e shpallën fitues mjuziklin "La La Land".
Ndërsa pasi në skenë u ngjit ekipi i atij filmi dhe festoi fitoren, u kuptua se fitues i vërtetë ishte "Moonlight".
Dyshja e aktorëve i kanë bërë provat e nevojshme në Dolby Theatre, në mënyrë që ta përmirësojnë gafën nga viti i kaluar.
Edhe pse nuk ishte faji e as përgjegjësia e tyre për atë gabim, ata u bënë sinonim i njërit prej momenteve më të pakëndshme në historinë e 'Oscars'.
(Foto: YouTube/ABC)
Për gabimin, fajtorë janë Brian Cullinan dhe Martha Ruiz, partnerët nga kompania PricewaterhouseCoopers (PwC), të cilët kanë qenë të vetmit që kanë pasur qasje në zarfet me të gjithë emrat e fituesve.
Edicionin i sivjetmë, i 90-ti me radhë i Academy Awards, do të mbahet të dielën më 4 mars (në orët e para të të hënës me kohën tonë). /Telegrafi/
