Peja nuk ka arritur të regjistrohet në Federatën e Basketbollit të Kosovës (FBK).

Klubi i basketbollit pejan nuk ka arritur të shlyej borxhet ndaj FIBA-s dhe FBK-së dhe në këtë formë nuk e ka fituar të drejtën për të garuar në edicionin e ri të garave.

Në fakt, verdhezinjtë ishte raportuar se kanë paguar të gjitha detyrimet ndaj dy institucioneve, por që kurrë nuk u dëshmua një gjë e tillë.

“Shqiponjat” nuk e kanë shfrytëzuar as afatin shtesë që i kishte dhënë Federata, e cila vlente për deri në ditën e djeshme në ora 17:00.

Theksojmë se afatin e parë e kishte më 10 gusht, kurse të dytin deri të mërkurën (15 gusht).

Megjithatë, FBK-ja sot do të dal me një vendim zyrtar rreth klubit pejan, i cili besohet se do të jetë që qyteti i Pejës të mos ketë asnjë përfaqësues në Superligën e Kosovës.

Ndryshe, Peja është ndër klubet më të trofeshme pas luftës në shtetin tonë. /Telegrafi/