Monza nuk po punon që të luajë vetëm për mbijetesën në Serie A, por kërkon të ketë një përfaqësim sa më të mirë në elitën e futbollit italian.

Këtë gjë e konfirmon edhe afati kalimtar që po bën Adriano Galliani, i cili ka sjellë deri tani në ekipin e sapo-ngjitur në elitë emra si Stefano Sensi, Matteo Pessina, Andrea Ranocchia, Andrea Carboni dhe portierin Alessio Cragno.

Megjithatë Monza nuk ka ndërmend të ndalet, pasi dëshiron të afrojë një sulmues të njohur dhe emri që ka përfunduar në listën e Gallianit, është ai i boshnjakut Edin Dzeko.

Ky i fundit ka edhe një vit kontratë me Interin, por hapësirat te zikaltrit janë mbyllur me afrimin e Romelu Lukakut.

Prandaj Galliani po provon ta bindë Dzekon, duke i ofruar të njëjtën pagë që merr te Interit, por të ndarë në dy sezonet e ardhshme. Te Interi janë gati të heqin dorë nga boshnjaku, duke e dhënë edhe falas.

Tani drejtuesit e Monzas, Silvio Berluscoi dhe Galliani do të duhet që të bindin Dzekon, duke i ofruar një rol lideri dhe titullari në skuadër.

Duke parë blerjet dhe lojtarët aktual, Monza do të jetë një arrë e fortë për top klubet e Serie A./Telegrafi/