Pa përballje mes klubeve shqiptare, fundjava sjell xhiron e 14-të të Superligës së Maqedonisë

Fundjava në Superligën e Maqedonisë së Veriut do të sjell ndeshjet e xhiros së 14-të.

Pesë sfida do të luhen ditën e shtunë, ndërsa vetëm një takim është i rezervuar për të dielën. Kampionët në fuqi, Struga Trim Lum në këtë xhiro do të luaj në udhëtim me Brera Strumicën.

Atmosferë pozitive mbizotëron në kampin e struganëve pas fitores në derbi me Shkëndijën, të cilët tashmë kërkojnë edhe fitoren e radhës.

“Jemi në një moment shumë të mirë, sidomos pas asaj fitore ndaj Shkëndijës. Atmosfera në grup është e shkëlqyer, ka shumë pozitivitet në skuadër, ashtu që shpresoj një ambient i tillë të vazhdojë edhe pas ndeshjes me Brera. E respektojmë kundërshtarin, mirëpo nëse luajmë sikurse në ndeshjen e fundit, me përkushtim maksimal dhe dëshirë të njëjtë, besoj se edhe nga Strumica do të rikthehemi me rezultat pozitiv”, është shprehur Besart Ibraimi.

Shkëndija e Tetovës në shtëpi do të pret Tikveshin e Kavadarit. Kuqezinjtë në këtë ndeshje kërkojnë të kthehen në rrugën e fitoreve, pasi tre ndeshjet e fundit regjistrojnë dy barazime dhe një humbje. Lajm i mirë është paralajmërimi i rikthimit të “Ballistëve” në tribunën “Marshin Beqiri” dhe mesfushori Endrit Krasniqi beson se me tifozët prapa vetes, skuadra kuqezi do të jetë më e fortë për të sjellë reagimin e pritur.

“Mendoj se pas disa ndeshjeve në të cilat nuk kemi shkuar mirë, shpresoj që të kthehemi te fitoret. Ky është qëllimi ynë dhe besoj ta arrijmë në fund. Mendoj se të gatshëm apo jo, skuadra duhet të reflektojë, sepse tanimë është momenti i fundit për të reflektuar. Kështu që presim në ndeshjen e nesërme të fitojmë dhe të vazhdojmë tutje. Po, ky është një super lajm për ne, sepse është një mbështetje, është një reflektim ndryshe nga ne. “Ballistët” janë domethënia e këtij ekipi, kështu që me mbështetjen e tyre edhe për ne do të jetë më e lehtë”, ka thënë Endrit Krasniqi.

Skuadra tjetër shqiptare, Gostivari do të përballet me Bregallnicën në Reçicë, teksa Voska Sport do të luajë me Vardarin e Shkupit. Në program të ditës së shtunë është edhe ndeshja  Makedonija Gjorçe Petrov – Rabotniçki.

Ndërkohë të dielën do të zhvillohet vetëm një ndeshje, ajo ndërmjet Sileksit dhe Shkupit në Kratovë. Të gjitha takimet e xhiros së 14-t në Superligën e Maqedonisë së Veriut janë paraparë të luhen nga ora 13:00. /Telegrafi/