Të dyja skuadrat zhvilluan një gjysmë të parë relativisht të barabartë, ku mysafirët ishin me një nuancë më të mirë, ndërsa gjërat shkuan mbrapsht për Interin në pesë minutat e fundit të fraksionit të parë.
Pas një ndërhyrjeje në Maggion, Obi u përjashtua me kartonin e dytë të verdhë (41’), ndërsa për napolitanët u akordua penalti, edhe pse xhirimet treguan se ndërhyrja kishte qenë jashtë gjashtëmbëdhjetëmetërshit.
Julio Cesar e ndali goditjen e Marek Hamsik nga pika e bardhë, mirëpo aty ishte Hugo Campagnaro për të përmirësuar gabimin e bashkëlojtarit dhe për ta dërguar skuadrën mysafire në pushim me epërsi minimale (43’).
Në gjysmën e dytë, Interi ishte ‘i plagosur’, ashtu që Napoli e shfrytëzoi epërsinë numerike në fushë dhe presionin te vendasit për të shënuar edhe dy herë.
Një gabim të mbrojtjes vendase e shfrytëzoi Christian Maggio, i cili pranoi një pasim të Giuseppe Mascaras për ta dyfishuar epërsinë (57’).
Marek Hamsik e ngriti edhe më shumë avantazhin e Napolit pas një lëvizjeje të bukur dhe një pranimi të topit nga Ezequiel Lavezzi (75’).
Kjo fitore e pozicionon Napolin në vend të parë në tabelë me dy pikë më shumë se Juventus e Udinese që të dielën zhvillojnë ndeshjet e kësaj jave. /Telegrafi/
